MNF president-ah Zoramthanga a tling

Mizo National Front (MNF) party hruaitu thar atana tlingte chu nimin khan an party pisa, Mizo Hnam Rûnah inthlan buaipuitute'n an puang a, president atan Zoramthanga chuhtu awm loin a tling. Hetih lai hian, MNF office bearer (OB) ni lai panga zinga pahnih chuan inthlanah hian an chuh tawh lo.

November 27, Nilainia MNF president Zoramthanga hoa MNF Nomination Committee ṭhukhawm chuan official candidate tur an thlang a ni. Official candidate atan hian president-ah Zoramthanga, senior vice president-ah Tawnluia, vice president-ah Vanlalzawma leh Lalthlengliana, treasurer-ah K Vanlalauva te an thlang.

MNF official candidate-te khinga OB post pangate chuh duh dang an awm a nih chuan darkar 24 (nimin tlai dar 3 thleng) chhungin hming pek luh theih a ni a; hun tiam chhungin official candidate-te chauhin hming an pek luh avangin, returning officer Dr R Ramthara chuan nomination thehlutte zawng chu chuhtu awm loa tlingah nimin khan Mizo Hnam Rûnah a puang. Inthlan buaipuitute chu Pachhunga University College-a thawkte vek an ni.

MNF elected OB thar zingah hian OB la ni ngai lo pahnih - Lalthlengliana leh K Vanlalauva, MLA hlui ve ve an tel. OB ni lai panga zinga pathumte an tlin leh laiin, OB ni lai zinga pahnih - vice president ni lai ve ve R Tlanghmingthanga leh Dr R Lalthangliana te hming a lang ve tawh lo. Anni pahnih hian OB ni turin hming an pe lut lo a ni.

President leh senior vice president-ah chuan a ngai - Zoramthanga leh Tawnluia te an tling a; treasurer ni lai Vanlalzawma chu vice president-ah a tling. Vice president thar Lalthlengliana hi MNF political affairs committee member ni lai niin, treasurer thar K Vanlalauva chu national core committee member ni lai a ni thung. MNF office bearer tharte term chu kum 2022 thleng a ni ang.

MNF vice president ni lai chhuak ta Dr R Lalthangliana chuan Vanglaini palai zawhna chhángin, OB atana official candidate-ah a tel lo chu a vui loh thu a sawi a, "Pu ber ruahmanna a ni a, sawi pawh kan sawi tláng a, sawihonaah pawh a ding hmasa ber ka ni. Tunah chuan sorkar lamah ka buai ve tawh a, lungawi lohna leh harsatna ka nei lo," a ti.

R Tlanghmingthanga pawhin lungawi lohna a neih loh thu Vanglaini palai a hrilh a, "Tun hma aṭangin hotute thu thua awm ṭhin kan ni a, tunah pawh hotute tih ang ang hi lungawi takin ka pawm. Hnathawh turte min pe a nih chuan ṭhahnemngai takin ka thawk ang a, min pek loh chuan tihngaihna a awm chuang lo," a ti a; OB a nih tâk loh avangin MNF chhuahsan tumna a neih loh thu a sawi.