Zalen chanchinbuin kum 15 tlin an lawm Mizo of the Decade-ah R Ramhmangaiha

Pathianni chhuak ṭhin chanchinbu, Zalen chuan nimin khan Aijal Club-ah an kum 15 (quindecennial) tlin an lawm a, hemi puala kum 10 (2008-2018) chhunga Mizo mi chhuanawm leh hlawhtling 'Mizo of the Decade' atan R Ramhmangaiha (Hnam Chhantu), Electric Veng, Aizawl an thlang.

Inkhawm hi Zalen Quindecennial Celebration Committee convener Dr Chawnglungmuana'n a kaihruai a; khuallian Lalruatkima, IPR minister chuan, Zalen chanchinbuin kum 15 a tling chu a lawmpui thu sawiin, "Tunlai social media kan buaipui nasa a, ṭhalai zingah lehkha chhiar lo an tam avangin lehkha chhiar tura kan infuih thar a pawimawh. Lehkha chhiar hi finna lungphûm a ni," a ti. 

IPR Minister chuan, tunlai khawvelah a ṭha lam aiin a chhe lam sawi tam a ni chu ṭha lo a tih thu sawiin, "Infuih phûr leh talent hai chhuak zawnga hma kan lak a pawimawh," a ti a; mipuite chu diltu ni loa petu nih tum zawk turin a chah.

Zalen editor Vanlalrema Vantawl pawhin thu sawiin, entrepreneurship lamah sorkarin nasa lehzualin ṭan la se a duh thu a sawi a, "Skill development lamah pawh ṭan kan lak nasat a ngai. Kan ṭhalaite ruihhlo vanga an thi nasa lutuk pawh hi a veiawm tak zet a ni," a ti.

Zalen chanchinbu hian an kum 15 tlin pualin kum 10 kal ta, 2008-2018 chhunga Mizo zinga mi chhuanawm leh hlawhtling an thlang a; thlan theih tura chhawp chhuah mi pasarih aṭangin Mizo of the Decade atan Hnam Chhantu Pawl dintu R Ramhmangaiha an thlang. He lawmman hian thuziak, memento leh Rs. 10,000 a keng a ni.