KHAWTHLIR

Food, Civil Supplies and Consumer Affairs (FCSCA) minister K Lalrinliana hoin nimin khan Secretariat conference hall-ah eirawngbawlna gas home delivery kalpui ṭanna pilot project thlir lêt a ni a; FCSCA hotu te, gas agency aiawhte leh pilot project kalpuina khawtlang hruaitute an tel. Gas home delivery pilot project-ah hian harsatnate awm mah se, home delivery chu kalpui zel an rél.

KṬP, Lungdai Pastor Bial chuan nimin khan Lungdai Hmarveng Kohhran Hall-ah blood donation camp an huaihawt a, Synod Hospital tan thisen unit 27 an pe a, a petute mipa 23 leh hmeichhia pali an ni.

Kawlbem Branch YMA chuan nimin khan an khaw community hall-ah an branch YMA kum 50 tlin, golden jubilee an lawm a, Mizoram Assembly deputy speaker Lalrinawma'n hmanpuiin, jubilee hriatrengna lungphun a hawng. Lalrin-awma chuan, YMA-na laimu chu ṭanpui ngaite ṭanpui, chhiatní ṭhatnía inṭawiawm tawnna leh 'Sem sem dam dam, ei bil thi thi' tihte a nih thu a sawi.

Mizoram sorkara chief controller of accounts Lalthansanga, MFAS chu secretary-ah a kaisang dawn a, Finance secretary aṭanga November 30, 2019-a pension-a chhuak tur Sawihlira a thlak ang. Officer dangte pawh kaisang leh hna chelh tihdanglam a awm nual a; H Vanlalhuma chu chief controller of accounts-ah, Vanlalsawma chu Accounts & Treasuries director-ah an awm dawn a ni.

Cooperation minister C Lalrinsanga chuan nimin khan Registrar of Co-operative Societies pisa a tlawh a, thawktute nen an inkâwm. Minister hian thu a sawi bakah, Coope-rative Societies registrar Naveen Aggarwal chuan Cooperation department hnuaia hnathawh leh hmachawpte a sawifiah.    Naveen Aggarwal-in a tarlan danin, Mizoramah state level cooperative society 11 leh primary level society 1,169 a awm mek a; chu'ngte chu non-functional 228, poor 181, average 356, good 373 leh very good 42-te an ni.