Minister pahnih Lalzirliana leh Robert Romawia Insawifiah turin ZPM ṭhalaite'n an phût

The Times of India chanchinbu November 26, 2019-a chhuaka an ziah danin, Ministry of Development of North East Region (DoNER)-in Aizawla Central Jail tihchangtlunna atan December 29, 2014-ah cheng vbc. 13.07 pek a remti a, project sum pek chhuah aṭanga thla 36 (kum 3) chhunga hna thawh zawh tur a ni. DoNER-in sum  chu December 30, 2014 leh November 16, 2016-ah -ah cheng nuai 9.42 a pe (Instalment) chhuak.

Central Jail tihchangtlun hna thawk turin Mizoram sorkar leh North East Consultancy Services (NECS) ten inremna an ziak a; Mizoram sorkarin May 25, 2015 aṭanga October 13, 2017 chhungin cheng vbc. 10.46 chu IG (Prison) hnenah an pe chhuak a ni.

ZPM ṭhalai chuan, chhui chiannain a tarlan danin, June 23, 2015 aṭangin hna thawh ṭan a ni tih sawiin, "October 2018-ah hna thawh zawh tura tih a ni a, chumi aṭanga kum khat chuangah pawh thawh zawh a la ni lo. He hnathawh CAG-in a chhui chiannaah, hnathawh dan tur ruahman kalha thawh tam tak a awm tih hmuh chhuah a ni," an ti.

ZPM ṭhalai tarlan danin, record-a a lan dan chuan, PWD official-te'n contractor running account bill enfiah leh countersign an tih duh loh avangin technical sanction lak a ni lo a, department-in hna hi thawh ṭhat dan tur intiamna (performance guarantee) awm loin contractor hnenah work order an pe a, chu chu Central PWD Manual kalh a ni.

Central Jail tihchangtlun hna thawktu contractor-in computerized running account bill a siam tih leh, sum hmanna tichiang tur measurement book tel loin IG (Prison) hnenah sum lak chhuah nan a thehlut a, IG (Prison) 

aṭangin cheng vbc. 10.44 pek chhuah a ni tih CAG auditor-te'n an hmu chhuak a ni. Measurement book tel lo chuan cheng vbc. 10.44 hmanna chu a dik ngei em finfiah theih a ni lo.

ZPM ṭhalai chuan, CAG Report aṭanga a lan danin, Central Jail tihchangtlun hna thawhnaah dan kalha thil tih a tam a, corruption lian tak a awm ngeia a lan thu an tarlang a; "He project kalpui a nih laia Home minister Pu R Lalzirliana leh NECS neitu Pu Robert Romawia Royte, tuna MNF ministry-a minister pawimawh tak leh thil ti thei tak ni tate thuneihna hnuaia hetiang thil a thleng hi thil pawi tak niin kan hria. Ram hruaitu ni tlak loah leh innghahna tlak loah kan ngai a, an insawifiah kan phût tlat a ni," an ti.