ICFAI University-in convocation hmang

ICFAI University, Mizoram chuan nimin khan an hmunah Convocation vawi riatna an hmang a, Higher & Technical Edu­cation minister Dr R Lal­thangliana'n a hmanpui. 

Dr R Lalthangliana chuan, ICFAI University, Mizoram aṭanga under graduate leh post graduate degree nei tharte a lawmpui thu sawiin, "Mithiam tan hnathawh tur a la tam a, mi invawng leh taima tan hlawhtlinna kawng engkimah a awm," a ti a; inelna a san zel avangin mi aia thiam zawk nih tum turin zirlaite a chah.

HTE Minister chuan, sorkar hnaa innghat lo a, mahni kutkêa eizawnna - entrepreneurship leh skill development lama ngaihtuahna séng tur leh hma la turin zirlaite a ngen a; ICFAI University chung­changah, "Mizorama private university hmasa ber a ni a, harsatna tam tak a tawh pawh Mizoram sor­karin a hriatpui a ni," a ti.

ICFAI University, Mi­zoram 8th Convoca­tion-ah hian Master of Social Work zirlai 34, M.A (Education) zirlai 15, M.A (Political Science) zirlai 35, M.A (English) zirlai 15, M.Com zirlai pakua, M.Sc. (Geography) zirlai 16, MBA zirlai pathum leh under graduate zirlai eng emaw zat hnenah degree certificate hlan a ni.