NDPS Act chungchang zirho

Mizoram State Legal Services Authority (MSLSA), Excise & Narcotics department leh Champhai District Legal Services Authority (DLSA)-te chuan nimin khan Champhaia IPR Auditorium-ah damdawi hman sual leh ruihhlo chungchanga dan, NDPS Act chungchang zirhona an buatsaih.

Inkhawm kaihruaitu Champhai SLSA member secretary Vanlalenmawia chuan, Police leh Excise officer-te chu thil sual tite'n an phû tâwk hremna an hmuh theihna turin hnuchhui leh misual zawn chhuah kawngah uluk tur leh fimkhur turin a chah a; judicial officer-te pawh tih tak zeta police/ excise officer-te report zir chianga en zui ṭhin turin a chah bawk.

Seminar-ah hian Excise & Narcotics department assistant commissioner Peter Zohmingthanga'n NDPS Act hnuaia damdawi hman khawloh vên dan a sawi a; Champhaia additional district & sessions judge R Vanlalena'n NDPS Act awmzia leh nihphungte a sawi. Seminar-ah hian Police leh Excise officer-te leh Champhai DLSA member-te an tel a ni.