Post ṭhaa awm duh vanga thil kherh hi Mithiam tih atana mawi lo a ni - P&E Minister

P&E Engineering Officers’ Association (PEOA) chuan nimin khan CIRA Garden, Aizawlah Annual General Conference an hmang a, Power & Electricity minister R Lalzirliana’n a hmanpui. Minister chuan, post ṭhaa awm duh vanga thil kherh te, hotute biak ṭhat leh tlawnte chu thil zahthlak, mithiam tih atana mawi lo a nih thu a sawi.

R Lalzirliana chuan, P&E department hnathawh a langsar a, thawh ṭhat leh ṭhat loh a lang nghal mai ṭhin tih sawiin, fakna leh sêlnate chu ang khata ngaiin, an hnathawhnaah ṭhahnemngai leh zual turin engineer-te a chah a, "Mipui lamin min hriatpui lo mah se, line chhiate siam tura khawtlang hruaitute ngennate ngai pawimawha a hun leh hun lo pawh sawi loa in inpekna a hlu a, a fakawm a ni," a ti.

Transfer leh posting chungchangah P&E Minister chuan, "Mizoram hi kan ta a ni a, khawi hmunah pawh awm theihna rilru put thiam a pawimawh. Chutih rualin, hmun khata rei tak awm erawh chu thil ṭha ber a ni lo a, hmun ṭha leh nuam te, hmun hla leh harsaa ngaihte hi ang khata hrût a, Transfer & Posting Rules anga kal mai hi a ṭha ber a ni," a ti a; insîksâwi chungchanga mi thil ti thei rawih te, hotute biak ṭhat leh tlawn te, post ṭhaa awm duh vanga thu kherhte chu thil zahthlak, mithiam tih atana mawi lo a nih thu a sawi.

Minister hian P&E department chanchinbu, 'Kawlpetha' issue thar ber a tlangzarh nghal a ni. PEOA General Conference hi an pawl president Vanlal Tlana'n a  kaihruai a, member thar mi 10 an lawm bakah, an member pasarih pension-a chhuak tate thlahna hun an hmang a; chawhnuah ro an rêl a ni. PEOA hi kum 2000-ah din a ni a, member 134 an awm mek.