Êk-in thawm ṭhatna tur hmanrua vailiam
Swachh Bharat Mission - Grameen (SBM-G) Aizawl district hnuaia thingtlang khaw 77-a mimal êk-in thawm ṭhatna tur hmanruate chu nimin khan Zuangtuia PHE complex aṭangin SBM Aizawl district executive vice chairman Lalrammawia, PWD superintending engineer-in a vailiam.
Lalrammawia chuan, India ramah faina lamah nasa taka hmalak a nih thu sawiin, "Aizawl district hi inthiarna mumal nei lo awm lohna, open defecation free (ODF)-ah puan ni tawh mah se, êk-in nei ṭha tâwk tawh lote tan a thawm ṭhatna tur sem a ni dawn. In sa tharte'n êk-in ṭha an neih tel a ngai tih an hriat a ṭul a ni," a ti.
PHE SE chuan, thingtlang khuaa in zawng zawngte chu tun aṭanga kum 5 chhungin an inah tui connection pek vek tum a ni tih sawiin, "Hemi atan hian sorkar laipui chuan cheng vbc. 3,00,000.6 a ruahman a ni," a ti a; tui tel loin faina tak tak a awm theih loh thu a sawi.
Inkhawm kaihruaitu PHE executive engineer (Rural Watsan Division) Zothantluanga sawi danin, Aizawl district chu open defecation free-ah puan ni tawh mah se, inthiarna nei ṭha tâwk tawh lote an awm avangin ODF a ni lo palh thei a, chuvang chuan invenna atan inthiarna nei ṭha tawh lote hnenah a thawm ṭhatna tur bungrua sem a ni.
Faina leh thianghlimna lama hmalakna endiknaah National Annual Rural Sanitation Survey record-ah Mizoramin a tih ṭhat avangin World Bank aṭangin lawmman (incentive) sum eng emaw zat a dawng a, incentive sum chu Aizawl district pawhin chang vein, chu sum aṭang chuan êk-in thawm ṭhatna tur bungrua sem a ni.