Thianghlim takin kan inthlang - MNF President

MNF president Zoramthanga chuan, an party office bearer inthlan chu thianghlim taka kalpui a nih thu a sawi a, "MNF aṭanga péngte an daih rei ngai lo," a ti.

Zoramthanga hian nimin khan Mizo Hnam Rúnah thu a sawi a, "MNF elected OB-te term hi kum thum a ni nã a, kum nga hi kan kal dan a ni tlangpui. ECI (Election Commission) lam pawhin min zawt a, kan sawifiah chuan an hrethiam zel. Constitution kan amend a, elected OB-te thlang tur hian Nomination Committee kan siam a ni," a ti.

MNF President chuan, Nomination Committee-ah elected OB ni lai te, general secretary pasarih leh adviser pasarih leh, NCC leh PAC aṭangin mi 33 an awm thu sawiin, "Boral tawh leh zin bote an awm avangin mi 29-te'n ballot paper-in kohhran upa thlanin kan thlang a ni," a ti a; MNF OB-te chu ruat ni loin, thlan an nih thu a sawi.

Kum thar lamah nihna nei hrang hrangte an insiamrem hma chuan MNF Gen. Hqrs.-a nihna nei zawng zawngte chu a pangngaiin an kal rih dawn tih sawiin Zoramthanga chuan, "Kum tharah chuan a tharin kan kal chho thei tawh ang," a ti.

MNF President chuan, MNF aṭanga péngte an daih rei ngai lo nia sawiin, "A tirah han vul mah se, rei an daih ngai lo. Mimal leh pawl ang pawhin en rawh u. MNF hian harsatna tam tak a paltlang a ni," a ti a; MNF chuan a din tirh aṭangin a hming bulah emaw, hming tawpah emaw belh nei loin, 'Pathian leh kan ram tan' an la ti char char niin a sawi.

ZPM chungchang sawiin Zoramthanga chuan, "Kohhranin an vote tlak, rinawm leh ṭha ber anga insawite khan eng emaw thulha BJP an zawmpui duh takin an ke an dah chhuak reng a ni. Party hla pawh phuah se, an sak hmain a dang phuah zel a ngai ang. Zoram mipuite tan hetiang hi zui tlak an ni lo. Khawiah nge maw min hruai ang?" a ti.

Chief minister Zo­ramthanga chuan, a kaihhruai sorkar chu eptute'n sawiselna tur an hre lo nia sawiin, "Bul kan ṭan ṭha a, mi tam tak rin aiin Pathian zarah kan che ṭha nghal. Kan chêt ṭhatna min dâltu chu fûr rei lutuk leh Election Model Code of Conduct a ni," a ti a; eptute'n thu tling lo leh fahrah tê tê hmangin an bei niin a sawi. 

Zoramthanga chuan, social media-ah ṭawng­kam ṭawp pui pui nen dik lo taka beih a tâwk nia sawiin, "Police-te'n an han chhui a, pahnih chuan ngaihdam min dil tawh nghe nghe," a ti a, an party mite chu mi beihnaah an tuang tichhah turin a chah.

MNF inkhawmah hian senior vice president Tawnluia pawhin thu sawiin, Mizoram mipui ṭawngṭaina avangin Pathianin a tidam tih a sawi a, "Mipui tel loin ke kan pên thei lo. MNF chu Mizo hnam hmahruaitu kan ni. Kan hnathawhna kawng hrang hrangah Zoram mipui ṭawiawmna leh ṭawngṭaipuina ka ngen a, thuràwn leh rawt­na nei apiangin rawn thlen zel ang che u," a ti.

Mizo Hnam Rûna inkhawmah hian MNF vice president atana thlan thar pahnih Vanlalzawma leh Lalthlengliana te pawhin thu an sawi a ni.