Bike chetsualnaah mi 2 an thi

November 28, Ningani zan dar 8 vel khan Lawngtlai aṭanga KMMTTP Road-a bike-a chetsualnaah mi pahnih an thi a, pakhat dang a hliam.

Thu dawn danin, bike chesuala thite hi Lalramdingngheta leh a nupui Laldinzuali, Pangkhua, Lawngtlai district (Lawngtlai Vengpuia khawsa mek)-te an ni a, hliam chu Laldanmawia s/o Lalthlamuana, Lawngtlai Vengpui-II a ni. Laldinzuali ruang chu nimin zing dar 4:15 velah lak chhuah a ni a, Lalramdingngheta ruang chu zing dar 4:45-ah lak chhuah a ni bawk.

Lalramdingngheta te nupa leh Laldanmawia te hi Liapha (Kawlchawlui)-ah sangha man turin an kal a, an haw lam chu an bike headlight a ṭhat loh vangin KMMTTP Road-ah chesualin, kawng thlangah metre 90 vela thui an lum a, Lalramdingngheta leh a nupui Laldinzuali te chu a hmunah an thi a ni. Laldanmawia chu kawngpuiah vak chhuakin, an chetsualna bula Pioneer camp-ah a zualko a, camp-a awmte chuan Lawngtlai an panpui leh a ni.