Amit Shah hoin political party leh NGO-te'n CAB an sawiho

Nizan dar 10 khan Union Home minister Amit Shah hoin Mizorama tlawmngai pawl hrang hrang hruaitute leh political party-te'n New Delhi-a Assam House-ah Citizenship Amendment Bill (CAB) chungchang an sawiho.

Amit Shah hian CAB sawiho turin Mizorama tlawmngai pawl leh political party-te a sáwm a, ruahmanna hmasaah chuan nimin chhun dar 12:00-a sawiho tur kha a ni. Mahse, hun a chawpchilh avangin sawihona hun hi nizanah sawn a ni a, he thu ziah lai hian an thurêl hriat hman a ni lo.

Mizoram NGO aṭangin Central YMA president Vanlalruata, MZP president B Vanlaltána, MZP general secretary Lalnunmawia Pautu leh NESO finance secretary Ricky Lalbiakmawia te an kal a; political party aṭangin, BJP president Prof. JV Hluna, Congress secretary Lalhmachhuana leh ZPM secretary general K Sapdanga te an tel. MNF party chuan aiawh an intír lo thung.

MNF vice president Vanlalzawma chuan, naktuk (vawiin) hian chief minister Zoramthanga Delhi-ah a kal dawn tho avang leh niminah programme pawimawh an neih avangin aiawh an intirh loh thu Vanglaini palai a hrilh a, "CM hian lehkha a thawn bakah, Union Home Minister hi hmu turin ruahmanna a siam lâwk tho a ni," a ti.