Minister-in dawt muhlûm a sawi - Lalduhoma

Serchhip bialtu MLA Lalduhoma chuan nimin khan ZPM Tuikum Block conference-ah thu sawiin, amah chu MNF sorkara minister pakhatin MLA hlawh tihpun chungchangah dâwt muhlûmin a puh tih a sawi.

Lalduhoma chuan, amah chu GPC meeting-ah a tel ve avangin MLA hlawh tihsan duh a, tihpun duh angin minister pakhatin a sawi tih sawiin, "Hei hi dâwt muhlûm a ni. GPC meeting thu hi tih leakout chi a ni lo hrim hrim a, hetianga minister meuhin dâwt hmanga min bei chiam mai hi an khawngaihthlak hle a ni," a ti.

Tun hnaiah ZPM MLA-te'n MLA hlawh an la lo tih sawiin Lalduhoma chuan, "Hei hi kan Val Upa Council-te thu ang a ni. Hetiang hian ZPM chuan party uaptu kan nei hi kan vannei em em a ni," a ti a; Mizoramah thingtlang mipui, kut hnathawktute thleng phâk sorkar ṭha a awm thuai a ngai tih sawiin, "Chumi tur chuan theihtawp i chhuah ang u," tiin mipui a sáwm a ni.

Lalduhoma chuan, tunlaiin Mizoram politics-ah boruak thar a thleng thut thut tih sawiin, "Nimin lawkah MNF party chuan an hruaitu an thlang a, thâwm kan lo hriat dan chuan, an party chhungkaw boruak a chhiat phah hial ang em, tih turin thâwm a awm a, sorkarna fawng chelhtu an ni nãin, an khawngaihthlak hle a ni," a ti.

ZPM Southern Head-quarters treasurer Lalrinpuii pawhin thu sawiin, "Mizoram hian hruaitu ṭha kan mamawh a, ram hruaitu an ṭhat loh chuan mipui leh ramin a tuar ṭhin a, hruaitu ṭha chuan a thusawi leh thutiamte a hre reng ṭhin a ni," a ti a; MNF sorkar hruaitute chu inthlan dawna thu an tiamte hlen ngei tura a duh thu a sawi.

ZPM Tuikum Block conference hi Khumtung community hall-ah neih a ni a, Aizawl leh Lunglei aṭangin ZPM hotute'n an hmanpui a; kum 2019-2021 chhunga an hruaitu tur an thlang a ni.