Congress party-in CAB dodalna an lantir India President hnenah resolution an thawn

Mizoram Pradesh Congress Committee (MPCC) chuan nimin khan Vanapa Hall kawtah Citizenship Amendment Bill (CAB) 2019 duh lohna an lantir a; resolution an siam a, President Ram Nath Kovind hnena thawn turin Mizoram Governor hnenah an hlân.

CAB dodalna inkhawm hi MPCC treasurer Zodintluanga, MLA-in a kaihruai a, MPCC secretary Joseph Lalhimpuia'n report a pe. MPCC general secretary John Siamkunga chuan, Indian Citizenship Act, 1955 chu a la ṭhat tâwk thu leh ṭum li siamṭhat (amend) ni tawh mah se, ram, sakhua leh hnam hrang hrang an him ṭhin thu a sawi a, "CAB 2019 hi BJP sorkarin an kaltlangpui duh a nih pawhin, Mizoram hrût tel ve suh se," a ti.

John Siamkunga chuan, chief minister hlui Lal Thanhawla, MPCC president-in nasa takin CAB a dodal tih sawiin, "July 31, 2017 khan Union Minister for Law & Justice hnenah lehkha thawnin, CAB 2016 kaltlangpui tum mek chu hmarchhak state tan a him loh avangin pass a nih hmain Mizoram sorkar leh NGO-te ràwn ve rawh se, a ti a. Hetiang thu tho hi ziakin Joint Parliamentary Committee on CAB chairperson Dr. Satyapal Singh hnenah August 11, 2017 khan a thlen bawk,'' a ti a; Union Home minister Amit Shah-a'n tuna Mizorama tlawmngai pawl leh political party aiawhte CAB sawipui tura chawpchilh taka a ko chu mak an tih thu a sawi.

MZP vice president Peter Chhangte pawhin thu sawiin, MZP chu CAB duh lohna lantirna rêng rêngah tela hmalak zel an tum thu leh, Mizoram sorkarin a tih tur a tih ve a ngaih tawh thu a sawi a; MSU vice president J Lalmuanzuala pawhin, CAB duhtute chu Mizo mipuite'n a mupui hmanga ṭangrual taka an kah lêt a ngaih thu a sawi bawk.

CAB dodalnaah hian MPCC Media chairman Lallianchhunga kaihhruaiin CAB 2019 duh lohna resolution an pass a; resolution chu India President hnena thawn turin Governor PS Sreedharan Pillai hnenah pein, Governor Secretary hnenah an hlan a ni.

n    BJP kaihhruai Central sorkarin India Parliament-a pass a tum CAB 2019 hi sakhaw inthliarna (religious discrimination) hmanga India khua leh tui nihna pek theihna tur a nih avangin sakhaw zalenna (secularism) a palzút dawn a, chuvangin, CAB hi BJP sorkar hian hnûk kîr rawh se.

n    CAB 2019 hi dan bawhchhiaa India rama awm/cheng ru mekte India khua leh tui nihna pek theihna tur hmanrua a nih avangin Mizoram leh North East state dangte tan a him lo zual a, chuvangin, Central BJP sorkar hian CAB hi hnûk kîr rawh se.

n    North East state mipuite'n nasa taka an do, CAB 2019 hi BJP-in a pass lui dawn a nih chuan NE state-te huamtir suh se.