KHAWTHLIR

Lalthanpuii Khiangte chuan tun hnai khan National Institute of Technology (NIT) Mizoram aṭangin Ph.D a hmu a, NIT Mizoram aṭanga Mizo zinga Ph.D hmu hmasa ber a nih bakah, Mizo zingah Electronics & Communication Engineering-a Ph.D degree hmu hmasa ber a ni.

Lunglei District Child Protection Unit, Lunglei Police leh Lunglei Special Court-te ṭangkawp buatsaih naupang kumtling lo dan bawhchhiate leh dan bawhchhiatna avanga tuartute ngaihngam taka an awm theihna hmun tur ‘Child Friendly Corner’ chu Lunglei Police Station leh Lunglei Special Court-ah te nimin chawhnu khan DIG (Southern Range) Rajneesh Gupta-in a hawng. Child Friendly Corner-ah hian naupang in awm tleina tur thilte leh TV dah a ni.

PWD Annual Report, 2018-2019 chu nimin khan PWD E-in-C conference hall-ah PWD secretary JC Ramthanga'n a tlangzarh. Report tlangzarh inkhawm hi PWD E-in-C K Sawmvela'n kaihruaiin, JC Ramthanga chuan PWD-in an hnathawhte chhinchhiah a, en theiha an dah chu thil pawimawh tak a nih thu sawiin, "PWD hi Mizoram khaidingtu an nihna lai a awm avangin he report hi department hrang hrangte pawhin an hmang ṭangkai ang," a ti.

Mizo Students’ Union (MSU) chuan thuchhuah siamin, Council of Minister-in November 8, 2019-a an ṭhutkhawmnaah, Mizorama dan loa khaw dinah hmasawnna ruhrel din tawh lo tura thutlukna a siam leh, November 22-a LAD-in notification chhuah a, dan loa khaw dinah hmasawnna ruhrel siam tawh lohna tur thupek a siam chu lawmawm an tih thu an tarlang. Thupek hi a taka bawhzui turin sorkar an ngen nghal a ni.