Outstanding Entrepreneurs’ Award sem

Planning & Programme Implementation department hnuaia Entrepreneurship Development Centre (EDS) chuan nimin khan HYVE conference hall, Aizawlah Mizoram State Outstanding Entrepreneurs’ Award an sem a, Home minister Lal­chamliana'n a hmanpui.

Lalchamliana chuan, Mizoram State Outstanding Entrepreneurs’ Award dawng­tute zawng zawng lawm­puina leh duhsakna a hlan a, "Entrepreneur-te hian chhungkaw eng emaw zat eizawnna siamsakin, Mizo­ram mipui tan an thawh hlâwk em em a ni. Mizoram hi state a nihna la rei lo mah se, kawng tam takah hmasawnna a nei tawh a ni," a ti.

Home Minister chuan, sorkar hnain mi zawng zawng a daih loh avangin mahni kutkawiha din tum chu ṭha­laite tan tihmâkmawh a nih thu sawiin, "Sorkar pawhin entrepreneur scheme a ngai pawimawh a, SEDP nen pawh a inkawp rem a ni," a ti a; entrepreneurship lamah ṭhalaite chu pên chhuak zel turin a ngen. "A taima a piang an dingchhuak ṭhin. A bul ṭan ṭhat chu a chanve zo a ni tih a ni a, amaherawhchu, a tàwp thlenga ṭha taka thil tih hi a pawimawh lai zawk a ni," a ti bawk.

Inkhawm kaihruaitu Lal­nunmawia Chuaungo, chief secretary chuan, Mizoramin EDS mumal taka a neih ṭanna chu January 18, 2017 a nih thu sawiin, "Sorkar chu mipuite tana kawng kawhhmuhtu leh dan leh hrai siamtu a ni," a ti a; lehkha zir lai aṭanga entrepreneur chungchang ngaihven tur leh hlawh neia mi dangte hnena inhlawh lo a, mi dangte hlawh neia ruaitu nih tum turin ṭhalaite a chah a ni. 

Award hming    Dawngtu

Outstanding Entrepreneur    CB Lalliankhuma (CB Rice Cake)

Outstanding  Women Entrepreneur    Laltanpuii (Zozia)

Outstanding Entrepreneur    F Hrangvela (F Hrangvela Group of Industries)

Lifetime Achievement Award    Zonunsang Handloom leh Hmingliani Bakery