Independent MLA-te hnathawh ṭha an ti

ZPM ṭhalai chuan thuchhuah siamin, ZPM party thlâwp MLA-te'n an fund an hman dan leh MLA fund hmanga thil siamte chu a ṭha hlea an ngaih thu an tarlang.

ZPM ṭhalaite chuan, an party thlàwp MLA-te MLALADS sum hmanga hmun hrang hranga hnathawhte an hmu mek zel tih sawiin, "A chhawrtu tur leh hmang ṭangkaitu tur veng bil leh mipuite chauh ni lo, Zoram pumin fak tlak leh ṭha an tih tlân khawpa hnathawh a ni mek zel hi lawmawm kan ti a, tun hma anga a thawktute sawi lan ngam loh khawpa hna chhia hmuh tur a awm lo," an ti a; kalphung thar hmanga hmasawn zawnga ke an pên chu lawmawm an tih thu an sawi.

Independent MLA, ZPM thlâwpte'n an fund hmanga hna an thawh dan chuan MLA fund leh hmasawnna hna dang thawhna reng rengah inelna thianghlim, ram leh hnam leh mipui tana hlâwkna tur thlen se an duh thu sawiin ZPM ṭhalai chuan, "Sum sên phu ang ngeia hna ṭha leh tlo tur hmuh chhoh zel kan beisei a, hlâwkna aia hmingṭhatna lam dah pawimawh zel ni se kan ti. Party hrang hranga MLA-te'n MLA fund hman danah ṭan an lak chhoh phah ta zel hi lawmawm kan ti hle a ni," an ti.