MZP Quiz-a thiam ber - St. Paul's HSS

Mizo Zirlai Pawl (MZP)-in high school zirlaite tana Inter High School Quiz 2019 an buatsaih chu Ignite Studio, Aizawlah No­vem­ber 28, Ningani zan khan zawh a ni a; St. Pauls Higher Secondary School pakhatna an ni.

Inter-High School Quiz 2019-ah hian sikul 12 an tel a, pakhatna St. Pauls HSS-in lawm­man­ah Rs. 30,000 an dawng a; pahnihna - Kids Care School, Ramhlun South-in Rs. 20,000 leh pathumna - Mount Carmel School-in Rs. 10,000 an dawng. Pawisa fai bakah, trophy leh thuchei an dawng tel. Quiz-a tel zawng zawngte lawmman pek an ni bawk.

Quiz khârna inkhawm­ah Higher & Technical Education minister Dr R Lalthangliana chu khuallian a ni. Minister chuan, quiz-a tel zirlaite HSLC result chhuaka top 10-a inhlángkai an awm ṭhin chu lawmawm a tih thu sawiin, zirlaite chu an hmalam hun atan quiz chu hlâwkpui tum tur leh ruihhlo, zûk leh hmuam laka fihlim tlat turin a fuih.

Dr R Lalthangliana chuan, Mizoram chu silai leh bomb hmang ni loin, nasa takin HIV/AIDS-in a rún mek tih sawiin, "Heng natna ṭihbaiawm takte'n kan ṭhalaite min suat mek hi a lungchhiatthlak. HIV/AIDS do nan nasa taka hmalak a ṭul a, kohhran hrang hrang ṭhalaite'n thawhhona ṭha zawk an neih theih nan hmachhawpte pawh kan nei a ni," a ti.