HSS Games-ah Mizo HSS an champion

Mizoram Higher Secon­dary School Games vawi 18-na November 25, 2019-a ṭan chu nimin khan khâr a ni a, Mizo Higher Secondary School, Aizawl chu pakhatna an ni.

Mizoram HSS Games khârna inkhawm chu nimin chawhnu khan Mizo H/S Field-ah neih a ni a, School Education director Lalzar­mawii'n kaihruaiin, School Education secretary Esther Lal Ruatkimi khuallian a ni.

Esther Lal Ruatkimi chuan, mihringte chu taksa, rilru leh thlarauah an hrisel a ngaih thu sawiin, "Taksa a hrisel loh chuan rilru, sûkthlêk leh awm dan a nih tur ang a ni thei lo a, taksa hriselna pawimawhzia hriain Education department chuan infiamna lamah kawng hrang hrangin hma a la a ni," a ti a; zirlaite chu an taksa leh rilru hriselna ngai pawimawh turin a chah.

Games khârna inkhawmah hian trophy leh medal-te sem a ni a, November 19-22, 2019 chhunga 65th National School Games 2019, Boxing Under 17 Boys, R Dengṭhuama Mul­tipurpose Hall-a neiha Mizoram tana medal latute hnenah lawmpuina hlan a ni bawk.

HSS Games-ah hian pakhatna Mizo HSS-in gold medal 15, silver medal pasarih leh bronze medal pakua lain, a vaiin medal 31 an la a; pahnihna Baptist HSS, Serkawnin medal 20 lain, pathumna KM HSS, Aizawlin medal pakua an la thung.

Tun ṭum HSS Games-ah hian infiamna chi sarih - athletics, football, volleyball, basketball, table tennis, badminton leh taekwondo-ahte intihsiak a ni a, HSS 23 aṭangin zirlai leh zirtirtu 1,138 an tel a ni.