SCERT-in Poetry Festival an buatsaih English-a ti ṭhate Profi- ciency Award hlan a ni

SCERT chuan nimin khan an auditorium-ah Sap ṭawng thiamna leh thu leh hla lama intihsâwt tawn­na, 'Peotry Festival' an hmang a, 'Profi­ciency Award in English’ an sem nghal. He hunah hian Human Resource Development Board vice chairman L Thangmawia, MLA khuallian a ni a, School Education secretary Esther Lal Ruatkimi khualzahawm a ni.

L Thangmawia chuan, sap ṭawng thiamin mahni inrintâwkna a pe thei tih sawiin, "Sap ṭawng hmanga kan insawifiah thiam tâwk loh ṭhin avangin harsatna kan tâwk fo. Ṭhangtharte erawh chuan sap ṭawng an thiam tawh hle a, chu'ng thiamnate chu Mizoram tana chhenfâkawm nih phah nan hman thiam a ngai a ni," a ti.

Pawl 10 leh 12-a tih ṭhat a pawi­mawh rualin, a hnu lam zelah ṭan mar zel a ngaih thu sawiin Thangmawia chuan, "Harsatna tam tak paltlang a ngaih hunah pawh huaisen taka hma­chhawn a ṭul," a ti a; zirlaite chu hna an thawh hunah pawh mahni tuina ngei thawh tum turin a chah.

Esther Lal Ruatkimi chuan, Mizo ṭawng thiam ngei a ṭul thu sawiin, mahni ṭawng thiam lo chu khawtlanga nu leh pa ráwn an nih ngai loh thu a sawi a, "Mizo ṭawng thlauhthla chuang loin sap ṭawng thiam a pawimawh," a ti. Poetry Festival hi higher secondary school tan bik kum 2011-ah buatsaih ṭan a ni a, a tum ber chu - sap ṭawng thiamna lama intihsâwt tawn leh zirlaite thu leh hla lama an tui theih nan a ni. Festival-ah hian Aaron Lalrinawma, Mt. Carmel School pakhatna a ni a; Jason L Khiangte, Mizo HSS leh John Lalawmpuia, St. Joseph HSS-te chu pahnihna leh pathumna an ni.

Proficiency Award in English hi kum 2010-11 aṭangin HSLC leh HSSLC Examination-a English subject-a ti ṭha zualte hnenah hlan ṭhin a ni a, zirlai tam zawkin sap ṭawng lama hma an sawnna tura buatsaih a ni. Award sem ṭan tirh 

aṭangin zirlai 253 hnenah award hlan a ni tawh a, kum 2018-19 chhung atan mi 18 hnenah hlan a ni. Lawmman pakhatnain Rs. 5,000, pahnihnain Rs. 4,000 leh pathumnain Rs. 3,000 an dawng.