Hnam thila Serchhip YMA hmalakna puang

YMA Sub-Headquarters, Serchhip hnuaia Kumpuan Committee chuan November 28, Ningani khan YMA Sub-Hqrs. pisaah Serchhipa thuthar thehdarhtute an kâwm a, an hmalaknate an hrilh.

Sub-Hqrs. YMA, Serchhip president R Sanghmingthanga chuan, Mizoram chhehvela hnam dang tam tak chu sumdawnna hmanga chîmral an nih tawh avangin, Mizote an fimkhura ṭan an lak a ṭul thu a sawi a; Mizoram chhim lam chu sumdawnna kawngah hnam dang sumdawng liante'n an chîmral mek nia a lan thu sawiin, "Serchhip hi ram laili a nih avangin mi dangte entawn tura theihtawp chhuah a ṭul. YMA-in Serchhipa sumdawnna lian tak tak kalpui tum hnam dang eng emaw zat chu dan tlawhchhanin kan ûm chhuak tawh a, Serchhipa Mosolman biak-in sakna tura ram hralh tawh pawh ram leitute leh ram neitute inthleng lettír leh a ni," a ti. 

Hnam dang ṭhenkhatte'n Mizo nupui an neihte hmanga Mizorama sumdawn an tum ṭhin chu dàn kalh a ni tih sawiin R Sanghmingthanga chuan, Mizo hmeichhia, hnam dang (non-tribal) pasal neite chu non-tribal an ni ve nghal a, an fate pawhin tribal-te hamṭhatna an dawng thei tawh lo tih a sawi bawk.

Serchhip YMA Kumpuan Committee chairman Lalzuiliana chuan, kumina YMA General Conference-ah kumpuan atan 'Zirna uar' tih thlan ni tawh mah se, Central YMA-in a la hawn loh avangin YMA Sub-Hqrs. pawhin kumpuan kal lai, 'Ram leh hnam humhalh' kawngah an la insàwrbing thu a sawi.

Kumpuan Committee sec­re­tary Lalrammuana chuan, Mizoramah hnam dang sumdawng an awm lohna tur te, ILP dik taka hman a nih theihna tur leh, hnam dang nupui pasal nei lo tura inzirtirna kawngahte Kumpuan Committee-in hma an lak ṭhin thu a sawi a ni.