Aizawl bazara bûknate endik a ni
Legal Metrology enforcement-te leh Mizoram Merchants Association (MIMA) hruaitute chuan September 28, Inrinni khan Aizawla bazar hrang hrangah sa zuarte'n bûkna (patla) an hman a dik leh dik loh an enfiah a; a tlangpuiin bukna an hmante a dik hlawm a, patla dik lo hmang an awm zeuh zeuh bawk.
MIMA thuchhuah tarlan danin, social media-ah Aizawla bazar hrang hrangah leh sa zuarte'n bûkna dik tâwk lo an hmang ṭhin anga video thehdarh chu MIMA-in an bawhzui a, Legal Metrology department-ah bûkna enfiah turin rawtna an thlen a ni. MIMA rawtna angin Legal Metrology enforcement-te leh MIMA hruaitute chuan Inrinni khan bazar hrang hrangah bûkna an hmante an enfiah.
Bûkna an enfiahna hmunte chu Mission Veng bazar, Kulikawn bazar, Treasury Square bazar, Tuikual bazar, Dinthar bazar, Vaivakawn bazar, Bawngkawn bazar leh Zemabawk bazarte a ni a; mi 400 chuangte'n bûklung an hmante an endiksak a ni.
MIMA chuan, bazar hrang hranga bûkna an enfiahnaah, bûkna leh bûklungte chu a dik tlangpui a ni tih sawiin, "Mipuiin thil lei sa bûksak an nih hnuah an bûklungte endiksak a ni a, gram 10 vela tling lo pathum vel hmuh chhuah a ni," an ti.
MIMA chuan, "Hetianga enfiah a nih hnuah chuan, bûkna dik lo khawi maw laia mi avanga Aizawla sumdawng zawng zawngte bûkna dik lo hmang vek anga an sawi hi tih tawh loh ni se kan duh," an ti a; thu chiang hre hmasa phawt ṭhin turin Mizo mipui an chah a ni.