Bru lâk lêt hna ṭan a ni dawn ta Team ṭhenkhatin Bru camp an pan

Mizoram aṭanga Bru tlân chhuak, Tripura relief camp-a awm mekte hruai kîr thawh riatna chu October 3, Nilaini aṭangin ṭan a ni dawn ta a, nimin khan Home minister Lalchamliana hoin Secretariat conference hall-ah Bru lak lêt dan tur sawiho a ni. Lunglei district aṭanga Bru buaipui tur team chuan nimin zing khan Lunglei chhuahsanin Bru camp an pan.

Home Minister hoa meeting-ah hian Home department official te, Bru-te dahna tur district-a bawrhsap te, political party leh tlawmngai pawl hrang hrang hruaitute an tel a; Bru camp paruk aṭanga Mizoram Bru-te lak lêt dan turah Mizoram sorkar ruahmanna leh inbuatsaih dante thlirho a ni.

Home secretary Lalbiakzama'n Mizoram sorkarin Bru hruai kîr tura hun rei tak ata hma a lo lak tawh dante leh tun ṭuma sorkar inbuatsaih dan a sawifiah a; Bru lak letna tur senso mamawh chu Ministry of Home Affairs-ah thlen a nih thu leh Mizoram sorkarin cheng vbc. 100 a dawn tawh thu a sawi. Bru-te an lo lêt huna an awmna tur district pathum - Lunglei, Kolasib leh Mamit district-a DC-te'n Bru-te lo haw dan tur leh an inbenbelna tura ruahmanna an siam dante an sawi bawk.

Lalbiakzama sawi danin, Mizoram Bru-te hruai kîr turin kum 2016-ah identification tih a ni a, chhungkaw 5,407 chhinchhiah an ni tawh a; chung zinga chhungkaw 39 chu Mizoramah an lêt tawh a ni. Kuminah identification kalpui nawn leh a ni a, chhungkaw chhinchhiah tawhte pawh Mizorama kîr duh ngeite chu chhinchhiah nawn leh niin, Mizorama let duh chhinchhiah zat chu chhungkaw 4,410 an ni. Bru lak let hna hi October-November chhunga zawh hman tum a ni.

Meeting-ah hian, Mizorama Bru-te chu kîr ngei se an duh thu an sawi a; hruai kîr hna thawk tura sorkar leh NGO-te lungrual taka an thawh theih avangin lawmawm an tih thu te, Mizoram khua leh tui dik takte chu Mizoramah an let theih nan theihtawp chhuah tlân zel ṭha an tih thute an sawi.

Hetih lai hian, Lunglei district-a Bru hruai kîr hna thawk tura ruat official-te chuan nimin zing khan Lunglei an chhuahsan. Zing dar 6-ah Lunglei DC pisa kawtah thlahna hun hman a ni a, Lunglei DC K Lalrinzuali, SP C Lalthanmawia, CMO Dr Thani Pachuau, YMA sub-hqrs. president Lalrotluanga leh mi dangte an tel a; Rev. K Zonunsanga’n ṭawngṭaiin a thlah a ni.

Lunglei district-a Bru lak letna atan liaison officer turin Lunglei College zirtirtu pali - Zonunsanga Colney, Lalthanmawia, Z Lalthanliana leh Lalhriattira Fanai ruat an ni a, suppor­ting staff mi 10 leh police pali an tel a; motor pasarih hmangin Lunglei aṭangin Mamit an pan a ni.

Bru repatriation buaipuia zin chhuak mek Lunglei SDC Lalthakima Chhangte leh official dang awm sate nen Lunglei district aṭanga Bru lak let hna thawk tur chu mi 71 an ni a; repatriation thawh khatna atan city bus 19 hman a ni.

Lunglei district bikah Bru chhungkaw 364-a mi 2,051-te hruai kira dah tum a ni a, chu'ngte chu Khakchangpara camp aṭangin chhungkaw pathum, Hamsapara aṭang­in chhungkaw pahnih, Naisingpara aṭangin chhung­kaw 54 leh Hazacherra aṭangin chhungkaw 305 an ni. Lunglei district-a khaw paliah dah tur an ni a; Putlunga­sihah chhungkaw 121, Chawilung South-ah chhungkaw 43, Dintharah chhungkaw 187 leh Buknuamah chhungkaw 13 dah tura ruahman a ni.