Puan dum nena Amit Shah lo hmuak lo turin BJP-te'n NGO-te an ngen

Mizoram BJP hruaitute chuan nimin khan an pisaah thuthar thehdarhtute an kâwm a; Joint NGO Coordination Committee chu October 5, 2019-a Union Home minister Amit Shah, BJP president ni bawk a lo kal huna lungawi lohna lantirna atan puan dum nena lo hmuah an tum chu ṭhulh turin an ngen a; Mizoram mamawh leh duhte lo thlenna hun ṭha a nih zawk tur thu an sawi.

Mizoram BJP president Prof. JV Hluna chuan, Union Home Minister chu Delhi-a kal chilh pawha hmuh mai mai theih an nih loh thu sawiin, "Pawisa tam tak sénga Delhi pan ngai loin Union Home Minister hian Mizoram a rawn tlawh dawn a, a rualin DoNER minister Dr Jitendra Singh a rawn kal ang. NGO-te tan pawh CAB, NRC, Assam nena kan ramri, Bru chungchang, etc. lo thlenna hun ṭha tak ni zawk turah kan ngai. Home Minister hi NGO-te'n an hmuh ngei theihna atan hun insiam turin ngen kan tum," a ti. 

Prof. JV Hluna chuan, NGO-te chu zah tak leh ngaisang tak chung siin an thil tum ṭhulh turin thuhthar thehdarhtute kaltlangin an ngen tih sawiin, "Thuthar thehdarhtute kaltlang bakah, keimahni aṭangin NGO-te be tur kan inruat a, an thil tum ṭhulh turin kan ngen dawn. Sorkar pawhin NGO-te hi an thil tum ṭhulh turin an ngen turah kan ngai. Home Minister a ni a, official thila rawn zin tur a ni," a ti a; Union Home Minister rawn kal chu kan duh leh mamawhte thlenna hun ṭha a nih avangin lawm zawkna tura an ngaih thu a sawi.

Mizoram economy thlir chungin mipui tana ṭangkai tura Union Home Minister leh DoNER Minister rawn zin tur chu hman ni se an duh thu sawiin Mizoram BJP President chuan, "Sorkar thâ tichak turin he hun ṭha hi hman dan ngaihtuah ni thei se a duhawm hle. Hetiang taka mi pawimawhin min rawn tlawh tur hi puan dum nena lo hmuak lo turin NGO-te kan ngen tak meuh a, an rorel sa chu anmahni zah tak chungin sût leh hram turin kan ngen a ni," a ti.

Mizoram BJP president Prof. JV Hluna sawi danin, September 2, 2019-a Guwahati-a North East Democratic Alliance (NEDA) meeting-ah Assam nena ramri nei state chief minister zingah Mizoram chief minister Zoramthanga chiahin ramri chungchang a sawi lo a ni. Meeting-ah hian Assam nena ramri nei state chief minister-te chuan Assam nena an ramri chungchang an sawi vek a ni.