KHAWTHLIR

Sinlung Hills Council (SHC) final electoral roll chu nimin khan Aizawl leh Kolasib-ah tlangzarh a ni. Aizawl district chhunga SHC roll chu Aizawl DC Vanlalngaihsaka'n a tlangzarh a, Kolasib district chhunga SHC roll chu Kolasib DC C Zoengsanga'n a tlangzarh. Aizawl  district-ah chuan SHC hnuaiah voter 17,691 an awm a, Kolasib district-ah voter 3,995 an awm thung. Sorkar thuchhuah tarlan danin, SHC inthlan chu November 2019-ah buatsaih theih beisei a ni.

Nimin khan Kolasib DC pisa tual aṭanga Diakkawn Square inkarah UDPA department bultumin sikul naupangte'n plastic ṭhat lohzia leh hman tlem a ngaihzia mipuite zirtirna atan lehkha ziak kengin kawng an zawh. Anti Plastic Rally hi prime minister Narendra Modi-a'n Independence Day-a a thuchah, 'October 2, 2019 aṭang hian India ram mipuite'n single use plastics hman tawh loh ni se' tih bawhzuina a ni.

Lunglei North bialtu MLA Dr Vanlalṭanpuia'n a bial chhunga model village atana a puan Pang­zawl khua chuan nimin khan an khaw community hall-ah model village hawnna leh lawmna an buatsaih a, Dr Vanlal-

ṭanpuia, Mizoram Youth Commission chairman khuallian a ni. MLA hian Pangzawl khawtlang tan oxygen concentrator a pe a, Joint YMA leh MZP tan computer, Games & Sport Association tan infiamna hmanruate a pe.

Mamit District Level Committee on Cleanliness chu an chairman Dr Lalrozama, bawrhsap hoin nimin khan DC Conference Hall-ah an ṭhukhawm a, October 2-9, 2019 chhunga Faina Hapta (Cleanliness Week) hman dan tur an rêl. Meeting chuan, Faina Hapta chhungin Mamit khawpuia sorkar pisa, zirna-in, hotel leh restaurant-te fai leh fai loh endika lawmman siam an rel a; higher secondary school leh college zirlaite tan faina lam hawi hla inphuahsiak leh essay inziahsiak buatsaih an rel bawk.

PRISM party chuan thuchhuah siamin, Joint NGO-te'n Mizorama Union Home minister Amit Shah a lo kal laia Citizenship Amendment Bill dodalna lantir an tum chu an thlàwp thu an tarlang.