Nationalism leh economic development intluk rialin kan kalpui dawn - Lalthansanga

Nimina ZPM pisaa party chhung inkhawmah ZPM vice president Lalthansanga (Chatea) chuan thu a sawi a, ZPM-in sorkarna an chan hunah chuan Mizoram an kaihhruai dan tur chu - nationalism leh economic development intluk riala kalpui a nih dawn thu a sawi.

Lalthansanga chuan, sorkarna chelh tawhte'n ram an kaihhruai dan a dik loh avangin Mizo hnam dinhmun chu tihderthâwnin a awm mek nia sawiin, "Economics development pawh chutiang thoa an kalpui avangin kutdawh hnamah min chhuah zo a ni. Tuna sorkar chelh mektute pawh an opposition lai chuan ramri an ngai pawimawh viau a, an sorkar a, an hmalakna a beitham em em a, a hun laiin hma an lak tawh loh avangin an tan kawng a biboh zo ta a ni," a ti.

Kum 20 chuang Mizoram kaihruai tawhtute avangin Mizo hnam chu kutdawh hnamah an chhuah nia sawiin Chátea chuan, "A kum tèlin BPL an pung tual tual a, kan retheihna denchhenin kan ṭhenawm state aṭangin min rawn 'nuthûri zuam' zo ta. Kan dinhmun a ngêlngheh nan NLUP-ah cheng vaibelchhe tél an hmang a, kan ram chu kan rethei zual sauh zawk a ni," a ti a; NLUP atana sum hmante chu Bairabi Hydel Project atana hman ni zawk se, Mizoramin hma a sawn zawk tur thu a sawi.

MPC aṭanga ZPM-ah an inchhûn luh chhan sawiin Lalthansanga chuan, "Brig. T Sailo thlarau kan zah vang a ni. A policy tihhlawhtlin theihna awmchhun party a nih avangin thinlung takin ZPM-ah kan awm a, kan sorkarpui tawhte kha chuan lalna leh thuneih duh avangin min thawhpui mai ṭhin zawk a ni," a ti a; Mizoram tluchhe mek tun din leh nan Zoram mipui zawng zawng ZPM-a tel zel turin a sáwm a ni.