Ramri-ah na zawka ke pên turin MPC-in Mizoram sorkar an phût

MPC party office bearer-te chu nimin khan an president Lalhmangaiha Sailo kaihruaiin an pisaah an ṭhukhawm a; resolution siamin, Mizoram leh Assam ramri chungchanga buaina kal zelah huaisen taka Mizoram ramri chin humhalh a, tih tak zeta tun hma aia nasa zawka ke pên turin Mizoram sorkar an phût tih an tarlang.

MPC chuan, Bangladesh aṭanga Chakma foreigner a rûka Mizorama lutte dap chhuak a, ngawrh taka thawn kîr hna thawk turin Mizoram sorkar an phût a, "Tlabung khaw chhehvela dan loa Chakma ten khua an din vawiin thlenga inbenbel nana an la hman hi a rang thei ang bera ṭhiat ngei tawh turin Mizoram sorkar kan phût nawn leh a ni," an ti.

Mahni duh thua Mizoram chhuahsantu Bru-te chungchangah MPC chuan, "Mizoram sorkarin an hamṭhatna tur thil chi hrang hrang ruahmansak chung leh vawi riat hruai kîr tuma a hmalakna duh lo a, vawiin thlenga Tripura-a la khawsa te, Mizoram sorkarin hruai kir leh ngei tuma a hmalak thar lehna pawh hi an la duh lo fo a, a la hlawhchham zel a nih chuan Mizoram sorkar hian hruai kir a tumna hi tawpsan tawh mai se tih hi kan duh dan a ni," an ti bawk.