SBI-in Customer Outreach Programme buatsaih dawn

Nimin khan State Bank of India (SBI) hotute'n Aizawl Press Club-ah thuthar thehdarhtute an kâwm a; October 3-4, 2019 chhungin Aizawl leh Lungleiah eng segment pawha loan hrang hrang la duhte pan theih turin 'Customer Outreach Programme' an buatsaih dawn thu an puang.

SBI Regional manager Lalchangkima chuan, Customer Outreach Programme chu Aizawlah October 3-4, 2019 chhungin Kulikawn YMA Hall-ah zing 10 aṭangin neih tur a nih thu a sawi a, "Aizawla bank hrang hrang 21-in stall an siam dawn. Bank hrang hrangin a tam thei ang ber loan (personal loan, business loan, agricultural loan, etc.) pek chhuah an tum a, loan pek theih zat bituk a awm lo," a ti.

Lalchangkima sawi danin, a ṭul dan azirin sanctioning letter leh provisional letter-te pek chhuah a ni dawn. Loan interest rate chu bank hrang hrangte'n anmahni interest rate angin an kalpui dawn a ni. Lungleiah chuan October 4, 2019-ah UDPA hall-ah Customer Outreach Programme hman tur a ni a, Lungleia bank pasarihte'n mipui dawr theih turin stall an siam dawn a ni.