MPCC-in Joint NGO hmalakna an thláwp

Congress party chuan thuchhuah siamin, October 5, 2019-a Union Home minister Amit Shah, BJP president chu Mizorama a lo kal hunah Citizenship Amendment Bill (CAB) duh lohna lantirna atana Joint NGO-te'n pawndum nena lo hmuah an tum chu an thlàwp tlat thu an tarlang.

MPCC chuan, Mizote tana him lo CAB kaltlangpui tum mek duh lohna NGO Coordination Committee-in an lantirnaah Aizawl khawpuia Congress party mi leh sate chu pawndum nen tel vek turin an ngen a, "MPCC pawhin Union Home Minister hnenah hian CAB duh lohna memorandum kan lo thehlut dawn a ni," an ti.

CAB chu Mizote tana him lo, inchîmral theihna tur dan hlauhawm tak a ni tih sawiin MPCC chuan, "A tìr tê aṭangin MPCC chuan a dodal nghal a. Pu Lal Thanhawla chief minister a nih lai khan na taka lehkha ziakin dodalna lantir a lo ni tawh ṭhin. North east mipui tam zawkin CAB kan duh lo chungin BJP kaihhruai sorkar chuan kaltlangpuia mi barh luih a tum ruh hle a, chuvang chuan a theih dan ang anga CAB dodalna lantir chu tihmâkmawh a ni," an ti a; Lok Sabha MP C Lalrosanga chu inthlan dawna a intiam ang ngeiin CAB dodal tura an phût thu an sawi bawk.