AICSU JNV-a Chakma zirlai kutthlak an dem

All India Chakma Students Union (AICSU) chuan, Jawahar Navodaya Vidyalaya (JNV), Thenzawla pawl 12 zirlai, Nolin Bikash Chakma chu nasa taka sawisak a ni tih tarlangin, an dem tak zet thu an puang.

AICSU chuan thuchhuah siamin, September 26, 2019 zanah Nolin Bikash Chakma chu JNV, Thenzawla Mizo zirlai ṭhenkhatin pindan pakhatah koin, kut an thlak rawn a, an hmanraw hman zingah iron rod-te pawh a tel niin an tarlang a, "Thlalak aṭangin nasa takin kut an thlak a ni tih a chiang a ni," an ti.

JNV, Thenzawlah Chakma zirlaite'n kut an tuar fo tawh nia sawiin AICSU chuan, "Chakma zirlaite'n tihduhdah an tuar fo a, an zirna a chhiat phah a, Chakma ṭhalaite rilruah ser nung ṭha lo tak a pian phah a ni," an ti a; Human Resource Development Minister leh Navodaya Vidyalaya Samiti (NVS) Chairman leh Commissioner-te chu a ṭul anga inrawlh tura an duh thu sawiin, thil thlen tawh dante an thlen tih an tarlang.

AICSU chuan, JNV, Thenzawla thil thlen dan zir chiang tur rang taka tír turin NVS an phût tih sawiin, "Tuna kut inthlakna mai bakah, JNV, Thenzawla inrêlbàwlna leh inenkawlna ṭha lo tak hi endik kan phût a, Nolin Bikash Chakma hliam inenkawlna senso pawh tumsak vek turin kan phût a ni," an ti.

Hetih lai hian, Vantawng chanchinbu Editor-in JNV, Thenzawla thil thlen dan bawhzuia September 29, Pathiannia a kalnaah, JNV-a school captain Lalnunhlima chuan, Chakma zirlai pakhat kutthlak chu September 25, 2019-ah pawisa bo a awm vanga indâwpnaa thil thleng a nih thu leh, chi leh chi inkar thil vang a nih loh thu an lo hrilh a ni.

JNV, Thenzawla zirlai kutthlak chungchang chhui turin JNV, Lungleia principal ni mek leh hun rei tak Thenzawl JNV-a principal ni tawh JC Lalsangzuala ruat a ni a, JC Lalsangzuala chuan September 29 khan Thenzawl JNV chu a hmunah a tlawh. JNV, Thenzawlah hian zirlai 206 an awm mek a, Chakma zirlai pawh mi 35 awmin, mipa 25 leh hmeichhia 10 an ni.

#    September 26, 2019: JNV, Thenzawlah Nolin Bikash Chakma, Class XII chu iron rod hmangin vuaka sawisak a ni.

#    November 14, 2016: JNV, Thenzawlah Chakma zirlai pahnih - Poribotan Chakma, Class-XI leh Prem Jyoti Chakma, Class-XI te chu Mizo zirlai rualin kut an thlak rawn.

#    October 12, 2016: JNV, Thenzawlah Sunil Chakma kutthlak a ni.

#    February 8, 2016: JNV, Thenzawlah Jumjum Chakma kutthlak a ni.

#    1997: JNV Hostel, Hrangchalkawn, Lungleiah Chakma zirlaite tihduhdah an nih avangin JNV thuneitute'n Chakma zirlai zawng zawng (43)-te chu JNV, Mou Gate, Senapati district, Manipur-ah sawn vek an ni.