Chief Minister-in Health Care Scheme a tlangzarh

MSHCS tlangzarh inkhawm hi chief secretary Lalnunmawia Chuaungo-in a kaihruai a; CM Zoramthanga chuan, MSHCS tihpuitlin nana hmalak dan tarlangin, "Sorkarin health care scheme a ngai pawi­mawh a ni," a ti a, MSHCS hnuaia hamṭhatna dawng theite chu inziak lut vek turin a sáwm.

Zoramthanga chuan, Mizoram sorkarin damlo enkawlna ṭha a ngaih pawimawh thu sawiin, "Inenkawlna ṭha mai bakah, Mizo damlo inenkawlte awmna turin Mizoram House leh hmun kan neih ang angte chu damlote awmna atana remchang turin thawm ṭhat tum a ni," a ti.

Khualzahawm Health minister Dr R Lalthangliana pawhin thu sawiin, "Health department-a thawktute chu mihringina kan neih hlut ber nunna enkawltu an nih avangin an pawimawh zual hle," a ti a; department-a thawktute chuan damlo enkawlna kawngah ṭawng­kam hmante leh dawnsawn danahte fimkhur zual a ngaih thu a sawi.

Health & Family Welfare Board vice chairman Dr ZR Thiamsanga, MLA chuan, MLA-te'n an hlawh aṭanga 1% chu health care scheme-ah an thawh tur thu a sawi a; chutiang hawi zawnga hma la ve turin sorkar hnathawk kalkhawmte chu a fuih.

Inkhawmah hian MSHCS chief executive officer Dr Biakthan­sangi'n MSHCS nihphung te, damlote'n hamṭhatna an dawn theihte leh inziah luh theih dante a lem nen a sawifiah a ni. MSHCS hi nimin, October 1 aṭang khan hman ṭan a ni. Inkhawmah hian minister C Lalrinsanga, K Lalrinliana, Lalruatkima leh TJ Lalnuntluanga te pawh an tel.

MSHCS nihphung ṭhenkhatte MSHCS hian a huam chin turte chu - sorkar laipuiin health care policy a duan, Ayushman Bharat - Pradhan Mantri Jan Arogya Yojana (AB-PMJAY) hmang ve thei lote an ni a, Mizoram chhung bakah, phai lama inenkawlnate pawh a huam. Inenkawlna bill theih tur chu Mizoram sorkar bithliah notified rate ang a ni.

MSHCS hnuaia inziah luhna atan kumin September - November chhung hun hawn a ni dawn a, local council/village council-te'n inziah luhna hmun tur an ruahman ang a, ṭum khat inziah luhin kum khat chhung zel a huam ang.

Mizorama sorkar­ ­damdawi-in zawng zawng­te chu MSHCS-in a huam dawn a, private damdawi-in zawng zawng­ah pawh hman a nih theihna atan Health department-in hma a la mek. Damdawi-in awm hma ni 10 leh chhuah hnu ni 10 thlenga inenkawlna bill theih a ni dawn a, organ transplant-te tan chuan ni 30 thleng bill theih a ni ang. Doctor certify-in admit hma investigation tihna atana senso a huam tel bawk.

MSHCS hnuaia gol­den card nei tawhte chuan October 1 aṭangin an card an hmang thei tawh dawn lo a, an inziah luh ṭhat leh a ngai dawn a ni. AB-PMJAY chu a ngai anga kalpui reng a ni a, chhungkaw pakhatin kum khatah Rs. 5,00,000 thleng an bill thei. AB-PMJAY-in a huamte chu - Ministry of Rural Development hnuai­a Socio Economic Caste Census (SECC), 2011 deprived list (chhungkaw harsa leh hnuaihnung)-a telte leh kum 2018-a RSBY hnuai­a smart card neite an ni.

AM-PMJAY hnuaia inziak lutte tan pawisa pe nghal lo (cashless)-in damdawi-inah inenkawl theih a ni a, kal velna leh zin veivahna erawh a huam lo. Scheme hnuaia inziak lutte chu India ram puma sorkar damdawi-in leh sorkarin a pawm mimal damdawi-inah an inenkawl thei ang. AM-PMJAY hnuaia inziak lut duhte tan sorkar damdawi-inah inziah luh theih reng a ni.