Sorkarin journalist-te a ngai pawimawh - Ruatkima

MJA chuan nimin khan Aizawl Press Club-ah tun hnaia Parliament House-a training-a kal an member mi 15 leh IPR department officer pangate pualin zin report pek inkhawm an buatsaih a; khuallian, IPR minister Lalruatkima chuan, Mizoram sorkarin thuthar thehdarhtu (journalist)-te a ngaih pawimawh thu a sawi.

IPR Minister chuan, chief minister Zoramthanga'n journalist-te a ngaih pawimawh thu sawiin, "Tun ṭum zinna atan leh journalist-te pawimawh dang atan Chief Minister hnenah Finance changtu a nih angin pawisa kan dil a, ani chuan 'Journalist-te chu an pawimawh a, anni tana kan tih ve theihah chuan theihtawp kan chhuah tur alawm' a ti a ni. Sorkarin thuthar thehdarhtute pawimawhzia a hria a, a ngai pawimawh a ni," a ti.

Sorkar thu leh hla mipuite hriattir chu journalist-te hna pakhat a nih thu sawiin Lalruatkima chuan, "Sorkar kal dik lohnaah pawh min sawisel a, kawng dik min kawhhmuhtu tur in ni,"  a ti a; journalist-te chu hleih nei loa kal turin a chah.

IPR Minister chuan, miin thuthar theh­darhtu emaw intiin social media-ah thil an post zung zung zel tawh tih sawiin, "Journa­list an nih ve miau loh avangin an thu post turah an fimkhur lo a, danin a phal lohte pawh thehdarh mai chíng an tam," a ti.

Lalruatkima chuan, mihringte chu inzir reng tur an nih thu sawiin, "Mihring tan inzir tàwp ní a awm lo. Khawvelah hian kan hriat loh hriat belh tur a awm zel a ni. Journalist-te pawhin hmasawn zelna tur tam tak in nei ang, chumi tur chuan inbuatsaih zel ang che u," a ti a; Parliament-a training-a kalte chuan Mizoram tana thil hlu tak an zir chhuah ngei a beisei thu a sawi.

Inkhawm hi MJA vice president Lalrem­siama'n a kaihruai a; IPR joint director Lal­ramliana Chawngte leh MJA general secretary Zohmingmawia ten zin report an pe a, IPR director Lallianpuii leh MJA president Zonunsanga Khiangte te pawhin thu an sawi a ni.