Medical doctor pension hun kum 62 ni turin Cabinet-in a rél

September 30, Thawhṭannia chief minis­ter Zoramthanga hoa Cabi­net room-a Council of Ministers ṭhukhawm chuan, medical doctor pension hun atan kum 62 an pawm.

Medical doctor-te supera­nuation pension-a an chhuah hun kum hi sorkar hnathawk dang ang thoin kum 60 a ni ṭhin a; mahse, Cabinet chuan pension kum atan kum 62-ah a tihsansak ta a, Mizoram sorkar hnathawk zingah pension kum atana 62 nei awmchhun an ni dawn nia thu dawn a ni.

Cabinet meeting chuan (nimina chhuak Vanglaini-a tarlan hman loh zingah) Rashtriya Uchchatar Shiksha Abhiyan (RUSA) hnuaia assistant professor 72 lak chungchang leh The Mizoram Colleges (Provincialisation) (Amendment) Rules, 2019 an pawm bawk.

RUSA hnuaiah hian tun hnai khan assistant professor 72 lak fel tawh a ni a, mahse, a scheme chungchangah ngaihtuah ṭhat ngai a awm avangin an hna zawmtir an ni lo. RUSA lamin hlawh tur kum hnih chhung atan 90% a tum thei dawn a, a bak chu state sorkarin an tum chhunzawm turin a ti a ni. Cabinet chuan kum hnih chhung atan assistant professor 72 lak an remti phawt a ni.