Upate Ni hman a ni

Nimin khan Mizoram hmun hrang hrangah Mizoram Upa Pawl (MUP) bultumin Upate Ni hman a ni a; deputy chief minister Tawnluia chuan Chawnpui MUP-te'n Chawnpui Presbyterian Koh­hran building-a inkhawm an buatsaih a hmanpui.

Tawnluia chuan, MUP member-te chu Pathian mal­sawm­na vanga MUP member ni thei an ni tih inhre turin a chah a, "Ṭhalai tam tak vui liam an nih laiin, kum upa tak thlenga in dam thei hi in vanneihzia hria a, tar intia inngaihtuah loin, kum upa tak thlenga Pathianin damna a pek avanga Pathian hnena lawmthu sawi a, in chanvo ropuizia hre thar rawh u," a ti.

Leitan Branch MUP-in an veng hall-a Upate Ni an hman chu minister Lalchhandama Ralte-in a hmanpui a, Leitan MUP-in upate in an sak mek lungphûm an phúm nghal. Lalchhandama Ralte chuan, tunlai khawvelah kum lama upate hlutna a zual zel dawn tih sawiin, “Chhungkua, kohhran leh khawtlang thilahte upate uapnaah kan hlim a, kan thla a muang ṭhin,” a ti a; kohhran leh khawtlang thilte chu ṭhangtharte kuta dah mai loin, upate pawimawhna hre thar deuh deuh turin kalkhawmte a sáwm.

Tunlai ṭhangtharte chu zilh leh kaihhruai an ngai hle tih sawiin Lalchhandama Ralte chuan, “Aia upa zahna te, tlawmngaihnate leh chhiatni ṭhatnia awm dan turte hi upate’n ṭhangtharte an hrilh thar a ngai hle. Mizo nunphungah mi lian leh tê awm loa khawsa ṭhin ni mah ila, tun hnaiah mahni inngaih pawimawhna a lian sâwt a, chuvangin, nunphung ṭha, kan hnam ze mawi hi ṭhangtharte zirtir zel a ngai a ni,” a ti.

Upate Ni hi Mamitah chuan District Legal Services Authority huaihawtin Siamliana Hall-ah hman a ni a, Mamit DC Dr Lalrozama’n a hmanpui a; Upate Ni pualin Mamit High School Veng aṭanga Charkawn thleng kawng an zawh.

Dr Lalrozama chuan, ram inrêlbàwlna kawngah naupang zawkte’n kan kaihhruai a ngaih cháng a awm tih sawiin, kum lama upa zawkte chu finchhuah an ngaihna apiangah inthlahrung hauh loa finchhuah turin a sáwm a, “Mi hmantlak leh hlawhtling kan tihte hi kum upa zawkte aṭanga thuràwn la leh inzir peihte an ni ṭhin,” a ti.

Lungleiah chuan Mizo Upa Pawl (MUP) Hqrs., Lunglei leh Lunglei Distict Legal Services Authority ṭangkawp buatsaihin Convention Centre-ah Upate Ni hi hman a ni. Upate Ni puala inkhawm hi Lunglei MUP president B Lalchungnunga’n a kaihruai a; khuallian Lunglei DC K Lalrinzuali’n thu a sawi.

December 14, 1990-a UN General Assembly chuan khaw­vel puma hman turin October 1 chu Upate Ni (International Day of Older Persons) atan a puang a ni.