Myanmar sipai hotute leh Sorkar official-te an inkâwm

Myanmar leh India sorkar inlaichìnna zir chiang tura rawn zin Myanmar sipai hotute leh Mizoram sorkar official-te chu nimin khan Aijal Club-ah an inkâwm.

Inkhawm kaihruaitu, GAD secretary Ashish Kundra chuan, inkawmhona chuan rah ṭha a chhuah ngei a beisei thu a sawi a; India ram democracy kalphung, Parliament leh state legislative assembly inrêlbâwl dan leh Election Commission of India kaltlanga inthlanpui buatsaih dante a lem nen a sawifiah a ni.

Inkawmhona hi chhawng hniha ṭhen a ni a; chhawng khatnaah Indian democracy leh election chungchang zirho niin, chhâwng hnihnaah dan leh thupek, tourism, art & culture leh trade & commerce chung­changte sawiho a ni. Sawihona hunah hian ramri kaltlanga danin a phal loh thil chi hrang hrang, ruihhlote nen tawlh rûk a nih thu sawi lan a ni bawk.

Myanmar sipai hotute hian Thawhṭanni khan Mizoram University an tlawh a, thawktute nen 'Democracy and federalism' tih thupuia hmangin an inkâwm a ni. Myanmar sipai hotute hi Lt.Gen. Aung Lin Dwe hoin an rawn kal a, an vaiin 10 niin, National Museum and Library (NMML), New Delhi-a hotute'n an ṭawiawm a ni.