KHAWTHLIR

Khawzawl Joint YMA, Khawzawl Welfare Committee leh Khawzawl College-a RUSA-te chuan nimin khan Khawzawl College-ah Khawzawla pawl 10 chin chung lam zirlaite pualin hmalam hun inkawhhmuhna, career guidance an buatsaih. Chawhmaah pawl 10 zirlaite tan hun hman a ni a, chawhnuah pawl 11 chin chung lam zirlaite tan hun hman a ni bawk a; pawl 10 zirlai 220, HSS zirlai 204 leh college zirlai 72 an tel a ni.

NIELIT, Aizawl Centre chuan vawiina Mahatma Gandhi pian champha pualin nimin khan swachh bharat an hmang a; director T Gunendra Singh hoin thawktute leh zirlaite'n Zuangtui kawngpui dung hnim an sâm fai bakah, bawlh­hlawhte an thian fai a ni.

Mizoram State Rural Livelihoods Mission, West Phaileng RD Block-te chuan September 19-30, 2019 chhung khan West Phaileng huam chhunga khaw hrang hrangah AH&Vety department-te nen thawkhoin free animal health camp an buatsaih. Health camp-ah hian ran chi hrang hrang hriselna dinhmun endik a ni a, damdawi a thlawnin an sem nghal bawk.

Traffic SP chuan hriattirna tichhuakin, vawiin, October 2 aṭanga October 9 thlengin PWD-te'n Dinthar aṭanga Aizawl Tennis Court panna kawng (Kaisara Road)-ah hna an thawh dawn avangin, hna thawh zawh a nih hma chuan Kaisara Road-ah lirthei tlân tlang phal a nih loh thu a tarlang. Thupek hian chhiatrupna thil kangmei leh emergency kaihhnawiha duty leh dan leh thupek pawimawh bika duty-te chetvelna a huam lo ang.

Sinlung Hills Council (SHC) inthlan vawi khatna atana returning officer leh assistant returning officer-a ruatte tan nimin khan Aizawl DC conference hall-ah training buatsaih a ni a, an mawhphurhna hrang hrang bakah nomination file chungchang hrilh an ni. SHC inthlanna turah hian Aizawl district-ah constituency 10 ah khaw 31 ah inthlan tur a ni.