Voluntary Blood Donation Day hman a ni

Nimin October 1 kha India rama thisen pekna ní, National Voluntary Blood Donation Day a ni a, Mizoramah pawh district hrang hrangah hman niin, hriat theih chinah mi 301-in thisen an pe.

National Voluntary Blood Donation Day (NVBDD) hmanna lian ber Aizawlah chuan Mizoram State AIDS Control Society (MSACS), Association for Voluntary Blood Donation (AVBD), Aizawl Civil Hospital (ACH) Blood Bank leh Pachhunga University College (PUC) NSS Unit-te huaihawtin PUC seminar hall-ah hman a ni a, Mizoram Youth Commission (MYC) chairman Dr Vanlalṭanpuia, MLA-in a hmanpui.

Dr Vanlalṭanpuia chuan, tun hnaiah India ram hmun ṭhenkhatah HIV kai zat an tlakhniam laiin, Mizoramah erawh chuan a pung zel zawk tih sawiin, "HIV/AIDS hi thapui thawha beih a ngai tak zet tawh a, a pun zel chuan mi dang nun chhan nana hlu ber thisen pek zat pawh a la tlahniam hle dawn tihna a ni a, HIV do let turin ṭhalai tha chak zawkte'n hma kan lak a ṭul tawh a ni," a ti.

MSACS project director Dr Lalthlengliani chuan, damlo thisen mamawhtute tan a thlawna thisen pekna lama mipui fuih phûr nan India rama 'Father of Transfusion Medicine' Dr Jai Gopal Jolly pian ní October 1-ah NVBDD hman ṭhin a nih thu a sawi a, "October 1, 1975 khan Indian Society of Blood Transfusion and Immunohematology buatsaihin India ram pumah hman a ni a, kum 1999 aṭangin Mizoramah hman ṭan a ni," a ti a; ṭhalaite chu thisen thianghlim pe thei tura invawng tlat turin a chah.

AVBD president C Lalnunnema pawhin thu sawiin, damlo mamawhte tana thisen dawn zinga 70% vel chu a huhoa pek (donation camp) a ni tih a sawi a, "A bak 30% chu mimal ṭhahnemngaiin an pek leh thlak leh tura pekte a ni. Kumin April leh August thla inkara voluntary-a thisen pek zat unit 12,398 a ni a, hei hi 89.57% a tling a, hmasawnna lawmawm tak a ni," a ti.

Kumina National Voluntary Blood Donation Day thupui chu 'Atleast donate once in a lifetime' (I dam chhungin thisen vawi khat tal pe rawh) tih a ni. NVBDD pualin PUC NSS Unit chuan blood donation camp an huaihawt nghal a, Aizawl Civil Hospital blood bank tan thisen unit 166 an pe a, a petute mipa 123 leh hmeichhia 43 an ni.

National Voluntary Blood Donation Day hi district khawpui hrang hrangah MSACS, AVBD, blood bank-te leh NSS-te huaihawtin hman a ni a; Lungleiah chuan Mizoram Polytechnic-ah hman niin, Lunglei HPC vice chairman Lawmawma Tochhawng, MLA-in a hmanpui. Lawmawma chuan, mi dangte tana thisen pek chu mi nunna chhanna a ni a, rawngbawlna hlu tak a ni tih sawiin, "Mi dangte tan thisen pek kawngah ṭan i la thar zel ang u," a ti.

AVBD Lunglei Branch secretary H Lalthangliana sawi danin, sorkar kum kal mekah April-August, 2019 chhungin Lunglei Civil Hospital-ah thisen unit 1,225 pek a ni tawh a, chung zinga unit 1,162 (94.86%) chu voluntary donation a ni. Christian Hospital, Serkawnah thisen unit 1,002 an dawng tawh a, chu'ng zinga 826 (82.44%) chu a thlawna pek a ni.

Lungleia NVBDD hmannaah hian June 2018 leh June 2019 chhunga pawl anga thisen pe ṭhate leh mimal vawi thum pete chawimawina hun hman a ni bawk. Siahaah chuan Saiha Higher Secondary School-ah hman a ni a, MTP president PP Zalena khuallian a ni. Saiha HSS zirlaite'n thisen an pe nghal a, mipa 23 leh hmeichhia 12-te'n unit 35 an pe. Champhaiah chuan DIET-ah hman niin, mipa 15 leh hmeichhia 12-te'n thisen unit 27 an pe. Serchhipah chuan Serchhip Bial PYD leh mi tlawmngai ṭhenkhatte'n thisen unit 27 an pe a, petute hmeichhia 14 leh mipa 13 an ni.

Mamitah chuan Mamit High School-ah hman a ni a, Mamita medical officer Dr Lalrinfela khuallian a ni. Mamit AVBD secretary Lalropuia sawi danin, kumin chhungin Mamit District Hospital blood bank-ah thisen unit 257 pek a ni tawh a, blood donation camp vawi 10 neih a ni tawh. Kolasib-ah chuan CZ Higher Secondary School-ah hman a ni a, thisen pek rûnpui huaihawt nghal niin, mipa 33 leh hmeichhia 13 ten thisen unit 46 an pe a ni.

Aizawl (PUC NSS Unit)    - 166

Siaha (Saiha HSS NSS)    - 35

Champhai (DIET)    - 27

Kolasib (CZ HSS)    - 46

Serchhip    - 27