Rashtriya Poshan Maah khâr a ni

September thla chhung zawnga hman, Rashtriya Poshan Maah (National Nutrition Month) chu nimin khan Synod Conference Centre-ah khâr a ni a, Social Welfare minister Dr K Beichhua’n a hmanpui. Mizoramin kum 2018-19 atana Rashtriya Poshan Abhiyaan (National Nutrition Mission) National Award a dawn chu lawm nghal a ni.

Social Welfare Minister chuan, September thlaa Poshan Maah hman chhungin district, block leh aganwadi centre level-ahte programme hrang hrang hlawhtling taka neih a ni tih sawiin, "He kan hlawhtlinna hi department pakhat hmalakna chauh a ni lo a, department hrang hranga hnathawkte inkara thawhhona ṭha kan neih vang a ni," a ti.

Dr K Beichhua chuan, nikum aiin kuminah department dang puihna leh ṭawiawmna an hmu ṭha tih sawiin, "Mipui leh pawlte'n he programme hi neitu nihna neiin an hlutpui chuan nasa takin an tihlawhtling a ni," a ti a; naupang leh nu nau paite tana chaw ṭha pawimawhzia zirtir chu Poshan Maah chhung chauh ni loin, dam chhungin mi dangte zirtir zel turin kal khawmte chahin, "Pheikhai rual taka kan thawhho zel chuan Poshan Abhiyaan thil tum - naupang ṭhan-

ṭhu tihtlem, ei chhiat vanga naupang chêr lutuk, thisen tlak­chhamna (anaemia)-te hi kan ûmbo thei ngei ang," a ti bawk.

Award lawmna hi Social Welfare secretary Zoramthangi Hau­hnar-in a kaihruai a, Women & Child Development director Vanlalpianpuii pawhin thu a sawi. Poshan Abhiyaan hnuaiah Mizoram chuan kum 2018-19 atan category pahnihah lawmman a dawng a, lawmman chuan pawisa cheng nuai 250 a keng. Mizoram chu Group-3 category-ah Implementation of ICDS-CAS ah leh Overall Excellence in Implementation-ah pakhatna ve ve a ni a; Overall Excellence Award-ah cheng nuai 150 leh ICDS CAS Implementation Award-ah cheng nuai 100 an dawng a ni. 

Field Level Leadership Awards-ah Champhai district-in 'Best District Award' an dawng a, Thingdawl ICDS Project-in 'Best Block Award' an dawng a; Champhai ICDS Project hnuaia Vengthlang Anganwadi Center-III leh Thingdawl ICDS Project hnuaia Bualpui Anganwadi Center-III ten Best Anganwadi Worker, Anganwadi Helper, ASHA, ANM & LS (AAAA & LS) Award an la a, lawmmanah Rs. 2,50,000 ve ve an dawng a ni.