Faina Hapta 2019 hman ṭan a ni
Nimin kha Faina Hapta hman ṭanna ni a ni a, zing dar 8-ah Vanapa Hall-ah Faina Hapta hawnna inkhawm neih niin, Mizorama khawpui (census town) fai intihsiakna leh short film competition lawmman sem a ni. A záwna a ṭum thumna atan Biate chu Mizorama khaw fai ber atan thlan leh a ni.
Inkhawma khuallian, chief minister Zoramthanga chuan, Isua zirtirna anga Mahatma Gandhi zirtirna 'Tharum thawh loa inremna siam' chu theihnghilh loa mahni nun ṭheuha seng lut turin mipui a sáwm a; Mahatma Gandhi hmalakna, tharum tel loa Britain laka India tana zalenna a sual chhuah dan chu khawvelin a ngaihlu a, chuvang chuan Gandhi pian champha, October 2 chu 'International Day of Non-Violence' atan UNO-in a puan thu a sawi.
Chief Minister chuan, Mahatma Gandhi pian champha behchhana faina lama hmalakna chu chhunzawm zel a nih tur thu a sawi a; sorkar laipuiin tui thianghlim mipui mamawh tâwk neih a ngai pawimawh tih sawiin, "Jal Shakti Ministry-in state tinte project siam turin a ti a, Mizoram sorkar pawhin, mipuiin tui thianghlim an hnianghnar theih nan ṭha zawka ruahtui khâwl khawm dan ngaihtuahin hmalak mek a ni," a ti.
CM Zoramthanga hian lehkhabu pahnih - Jal Shakti Campus leh Jal Shakti Gram a tlangzarh a; lehkhabute chu sorkar laipuia Ministry of Human Resource Development hnuaia Mahatma Gandhi National Council of Rural Education (MGNCRE), National Council of Rural Institutes (NCRI) tia hriat ṭhin hmalaknaa siam a ni.
Inkhawmah hian faina beihpui thlakna atana UDPA department-in khawpui fai inelna an buatsaih leh PHE department-in Swachh Bharat Mission Gramin hnuaia district-a khaw fai an thlante hnenah lawmman sem a ni. Mizorama khawpui (census town) 23 zingah Biate chu khawi fai ber niin, lawmmanah Rs. 2,00,000 an dawng. Biate hi UDPA department kum 2017 aṭanga khawpui fai inelna a siamah khawpui fai bera thlan a la ni vek a ni. Lawmman dawng lo khawpui dang zawng hnenah participation prize Rs. 10,000 hlan vek a ni bawk.
Faina Hapta puala inkhawmah hian khualzahawm Tawnluia, deputy chief minister pawhin thu sawiin, Mahatma Gandhi dam laia a ngaih pawimawh em em - faina leh thianghlimna hre renga India ram pum huapa hmalakna ngawrh taka kalpui a ni chu lawmawm a tih thu a sawi a; nasa zawka hmasawn theih nan thawhhona ṭha nei turin mipui leh sorkar hnathawkte a sáwm a ni.
Vanapa Hall-a inkhawm hi additional chief secretary JC Ramthanga'n a kaihruai a, minister te, MLA te, AMC hotu te, sorkar hnathawk officer liante an tel a ni. Inkhawmah hian Information and Public Relations department-in Mahatma Gandhi pian champha vawi 150-na puala short film insiamsiak buatsaiha ti ṭhate hnenah lawmman hlan a ni bawk a; Zami Vanchhawng siam 'Gandhi' tih chu pakhatna niin, lawmmanah Rs. 50,000 hlan a ni. Pahnihna chu 'Sakhaw zalenna' tih siamtu Albert Zosangliana niin, Rs. 30,000 a dawng a; pathumna 'Gandhi, Father of the Nation' tih siamtu Israel Lalmuanpuia Renthlei-in Rs. 15,000 a dawng bawk. PHE department-in Swachh Bharat Mission (Gramin) hnuaia Mizoram district hrang hranga khaw fai an thlante hnenah lawmman Rs. 20,000 ṭheuh hlan a ni a; chu'ngte chu a hnuaia mite hi an ni.
Khaw fai intihsiakna
I. A PUMPUIAH
1-na Biate (Rs. 1,00,000)
2-na Zawlnuam
3-na Serchhip
II. CAT-I (District khawpui)
1-na Serchhip (Rs. 1,00,000 + memento + certificate)
2-na Lunglei (Rs. 80,000 + memento + certificate)
3-na Kolasib (Rs. 40,000 + memento + certificate)
III. CAT-II (District khawpui ni lo)
1-na Biate (Rs. 1,00,000 + memento + certificate)
2-na Zawlnuam (Rs. 80,000 + memento + certificate)
3-na Thenzawl (Rs. 40,000 + memento + certificate)