Swachhta Hi Seva hman a ni

Urban Development and Poverty Alleviation (UDPA) department buatsaihin nimin khan Secretariat tual­ah Swachhta Hi Seva (Faina hi rawngbawlna a ni) tih thupui hmangin hun hman a ni a, deputy chief minister leh UDPA minister Tawnluia'n a hmanpui.

Swachhta Hi Seva hi kum­inah September 14 aṭanga October 2 inkara hman a ni a, chumi chhung chuan India ram pumah faina kawnga inzirtirna hun hman niin, kuminah chuan plastic hman nawn theih loh chi hmang lo tura inzitirna kalpui a ni.

Tawnluia chuan, Mahat­ma Gandhi-a'n faina a ngaih pawimawhzia hriatreng nan a pian champha vawi 150-naah hun pawimawh tak hman a ni tih sawiin, "Faina leh thianghlimna kawnga inzirtirna hi kalpui chhunzawm zel a ni dawn. Mizoramah pawh kum 1977 aṭangin Faina Hapta hman ṭan a ni a, hma kan sawn tawh hle. Faina lama hma­sawn kawngah leilung tichhetu plastic hmang lo tura inzirtir hi ngawrh leh zuala kalpui a ngai a ni," a ti.

Swachhta Hi Seva pual hun hmang tura kal khawmte chuan UDPA director Joseph H Lalramsanga kaihhruaiin plastic hmang lo turin an intiam a; chumi hnuah hlawm paliah inṭhenin, New Capital Complex chhung hmun hrang hrang tifaiin an hnatlang a ni. Hnatlangah hian Providence School leh Mt. Carmel School-a zirtirtu leh zirlai ṭhahnem tak an tel.