KHAWTHLIR

Mizo Theological Association (MTA) chuan nimin khan BCM biak-in, Ramhlun North-ah Biennial Conference an hmang. Chawhmaah Maj. Lalliankunga ziah 'Human trafficking' tih leh Rev. Zo­sangliana Colney ziah 'Council of Churches in Mizoram' tih­te zirho a ni a; chawhnu hun chu MTA president Rev.Dr C Lalhlira'n kaihruaiin, sawihona hun hman a ni. MTA member 55 telin, kum 2019-21 chhunga hruaitu tur an thlang a; president atan Rev.Dr R Zolawma leh secretary atan Rev.Dr K Lallawmzuala te an thlang a ni.

Mizoram police-a CID (Special Branch) leh Champhai Police Station-a mite chuan October 1, Thawhlehni tlai dar 6 vel khan Mualkawi leh Melbuk inkarah Tata Ace motor MZ-04 A-1743 aṭangin  sabawn báwm 12-a dah heroin gram 324.6 an man a, a neitu leh motor khalhtu Robuaia (48) s/o Sangzuna (L), Champhai Venglai nia insawi an man bawk. Heroin an man hi Rs. 12,00,000 vel hùa chhût a ni. Nimin zing khan Robuaia in aṭangin heroin gram 348.9 dang, Rs. 15,00,000 vel hù an man leh a ni.

Chhimphei Group YMA chuan nimin khan Zampuimanga lung­phun leh Hualngohmun inkara waiting shed leh hmunhma danga plastic/polythene leh bawlh­hlawhte tifaiin an hna-tlang a, bialtu MLA Dr F Lalnunmawia'n a telpui. Hnatlangah hian Chhimphei Group YMA huam chhunga YMA branch hrang hrang aṭangin member ṭhahnem tak an thawk chhuak a ni.

Nimin khan Lunglei khawpui chhungah mi pahnih ruang chhar a ni a, Lunglei Police Station-ah case ziah luh a ni. Vanglaini palai zawhna chhanga Lunglei SP C Lalthanmawia sawi danin, nimin chawhnu dar 1:30 vel khan Ṭhuamluaia Mual bulah  Lalchhuanawma (40) s/o Sanglura (L), Lunglawn chu thia hmuh a ni a, tlai dar 3 velah Sacred Heart School bulah F Vanlalhruaia (42) s/o  Lalrammawia (L), Zohnuai chu thia hmuh a ni bawk. Mitthi pahnihte hi ruih theih thil ti ṭhina sawi an nih avangin, drug overdose vanga thi an nih rin a ni a; Lunglei PS-ah Cr.PC 174 tlawhchhanin case ziah luh a ni.