Hmun hrang hrangah Faina Hapta hman a ni

Nimin khan Mizoramah Faina Hapta hman ṭan a ni a, hmun hrang hrangah faina hnatlang neih nghal a ni.

Siahaah chuan zing dar 7-ah Siaha bazar traffic point-ah Faina Hapta hawnna hun hman a ni a, SDO(S) B Malsawmtluangi'n kaihruaiin, additional DC K Vanlalṭhiana chu khuallian a ni. Plastic hmang lo tura intiamna thu an sawi rual.

K Vanlalṭhiana chuan, Siaha khawpui leh district pumpui a fai zual thei nan mipuite'n nasa zawka ṭan an lak a ngai tih sawiin, "Faina hi hapta kar khat awh tur chauh ni lo se, faina hian tàwp chin a nei tur a ni lo. Faina hi Pathian anna a nih angin kan in, kan chhehvel leh kan thinlung pawh a fai tur a ni," a ti.

Faina Hapta pual hian Siahaah veng, office, sikul, hotel & restaurant fai ber leh faina chungchanga ziak ṭha ber chanchinbu thlan a ni dawn a, zirlaite tan essay competition buatsaih a ni dawn bawk. Lawngtlaiah chuan Areopagy-ah Lai Autonomous District Council (LADC)-a executive member (LAD) H Chhuanawma'n Faina Hapta a hawng. Lawngtlai UDPA-a district project officer Rochuangkimi Khenglawt kaihhruaiin 'Swachhata Hi Seva' (Fai hi rawngbawlna a ni) hmalakna hnuaia 'Plastic hmang lo tura intiamna' (Pledge for a plastic free India) thu sawi rual a ni.

Lawngtlai bawrhsap Shashanka Ala chuan thuchah a sawi a, Nehru Yuva Kendra (NYK) bul tuma Fit India Campaign puala zínga tlân paha plastic bawlhhlawh chhar fai tura chhuak youth club-te zinga member chhuak ṭha zual panga hnenah NYK aṭangin football pahnih, volleyball pakhat leh net pakhat ṭheuh hlan a ni.

Faina Hapta hawnna inkhawm zawhah inkhawma tel sorkar official, tlawmngai pawlte leh zirlaite chuan khawpui chhung hmun hrang hrangah bawlhhlawh an thianfai nghal a ni. Tlabungah pawh SDO (Civil) Henry C Lal­rawnkima hoin Faina Hapta leh Swachhata Hi Seva pualin hun hman a ni a, thutiam an sawi rual a, faina hnatlang an nei nghal bawk.