Chite lui thianin ṭhalaite an hnatlang

Save Chite Lui Coordination Committee (SCLCC), Mizoram State NSS office leh Aizawl City PYD Coordination Committee (ACPYDCC) ṭangkawp huaihawtin nimin khan NSS Hna­tlangpui vawi 3-na neih a ni a, Chite luia bawlhhlawhte then a ni.

Chite lui thenfai hna­tlang hi hmun pathumah neih a ni a, minister R Lal­zirliana, minister of state Robert Romawia Royte leh Aizawl South-I bialtu MLA C Lalsawivunga ten hawngin an vai liam. Ramthar Veng kâia hnatlangte vai liamtu R Lalzirliana chuan, Chite lui chuan hmangaihtu leh lainattu a mamawh thu sawiin, "A kum tèlin Zo fate tana lui hlu tak hian chhiat lam a pan zel a, khawpuia chêngte'n phûr taka ṭan kan lak chuan Chite lui hi kan chhan­chhuak thei ngei ang," a ti a; Chite lui chu tun hma chuan Aizawl mipuite lui kalna leh sangha fuan venna a nih thu sawiin, tuna a dinhmun chu a lungawithlak loh hle tih a sawi.

Ramthar Veng mawng Chite luiah hian Pachhung­a University College, Synod Higher Secondary School leh Mamawii Higher Secondary School NSS volunteer-te an hnatlang a ni. Chite luia Chite veng kaia hnatlangpui chu Aizawl City PYD Coordination Committee bultuma neih niin, PYD member mi 400 vel an thawk chhuak a, minister Robert Romawia Royte-in a hmanpui. PYD-te hi PYD Social Work Day puala hnatlang an ni.

Robert Romawia chuan, Tourism minister a nihna angin Chite lui leh a chhehvel tihchangtlunna turin hmathlir thui tak a neih thu leh chak taka bawhzui a tum thu a sawi. Bethlehem Veng­thlang kâi leh a chheh­velah Mizo HSS, Ze­ma­bawk HSS leh JL HSS-a NSS volunteer-te leh zirtirtute an hna­tlang thung a, MLA C Lalsawivunga'n a hawng.

C Lalsawivunga chuan, zirlaite chu faina kawngah mite entawn tlaka nung tur leh faina lama hma hruaitu ni zel turin a fuih a; zirlaite leh ṭhalaite'n Chite lui humhalh turin hma an hruai peih phawt chuan, mipuite'n thatho takin an hnung an zui ngei a rin thu a sawi.

NSS hnatlangpui hi Favâng ṭan tîrah, kum khatah vawi khat neih ṭhin a ni a, kumin hi a vawi thumna a ni. Nimina Chite lui thenfai hna­tlangpuiah hian mi ṭha­hnemngai eng emaw zatin an ṭawiawm a ni.