CM leh Myanmar sipai hotute inkâwm

Mizorama rawn zin Myanmar sipai hotute chuan October 1, Thawhlehni zan khan chief minister Zoram­thanga chu a chenna inah an kâwm a; Chief Mi­nister chuan, India leh Myanmar ten inlaichìnna ṭha zawk an neih zel leh Myanmar ramin remna tluantling an neih ngei a duhsak thu a sawi.

Myanmar aṭanga sipai hotu lo zinte hi India sorkar inrêlbàwl dan te, sorkar laipui leh state sorkar inlaichìn dante zir tura 'Diplomatic Outreach Programme' hmanga rawn zin an ni a; Chief Minister-in Cultural Show-cum-Dinner a buatsaihsak a ni.

Inkhawmnaah hian India leh Myanmar ram inlaichìnna leh insumdawn tawnna chung­chang te, chumi atana Mizoram pawimawhnate an sawi a; sipaite zinga an hotu Lt.Gen. Aung Lin Dwe chuan, Kaladan Multi Modal Transit Tran­sport Project chu ram pa­hnih tana ei leh bâra thil ṭangkai tak a nih tur mai bakah, khawtlang nun chawikânna ṭha tak a nih tur thu a sawi.

Lt.Gen. Aung Lin Dwe chuan, Mizoram chu ram buai tak ṭhin aṭanga state rálmuang tak a ni ta chu fakawm a tih thu sawiin, "Remna tluan­tling a neih theih dan hi zir chian tham a ni," a ti. Myanmar sipai hotute chuan, Mizorama an lo kal thei chu lawmawm an tih thu sawiin, India rama an chàm chhungin an ram tana ṭangkai tur thil tam tak an hriat belh thu an sawi. 

Myanmar aṭanga sipai lo zinte hi Lt.Gen. Aung Lin Dwe bakah, Maj.Gen. Soe Naing Oo, Maj.Gen. Than Hlut Thein, Col. Khin Maung Kyi, Col. Kyaw Soe Oo, Col. Kyaw Lin Maung, Lt.Col. Than Soe, Lt.Col. Khin Zaw leh Capt. Thet Zin Aung te an ni a; nimin khan haw turin Mizoram an chhuahsan a ni.