Duhoma'n MHIP Meet a hmanpui

Serchhip bialtu MLA Lalduhoma chuan nimin khan a bial chhunga Tual­vungi Hall, Thenzawl­ah Ramlai Block MHIP Meet vawi khatna a hmanpui a; sorkarin hmasawnna hnathawhte chu tlawmngai pawlte nen enfiah ṭhinin awmzia thui tak a nei a, contractor-te'n an thawh ṭhat phah ṭhin tih a sawi.

Lalduhoma chuan, Pathianin mipa leh hmeichhia a siam dan, natural law anga mipa leh hmeichhia an awm mai chu ram leh khawtlang tan a fuh bera a rin thu a sawi a, "Pathianin mipa leh hmeichhe dinhmun tura a dah hriat chian a, chumi ramri kal pelh thui loh chu a pawimawh. Hmeichhe dinhmun châwi­ sàn kan tih rualin, mipa leh hmeichhe nihna leh tih tur kan theihnghilh ang tih a hlauhawm a ni," a ti.

Kawng hrang hrangah Mizo mipa aia hmeichhia­te lansarhna a tam tawh hle tih sawiin, Lalduh­oma chuan, "Mizo mi­pate kan tláwm tawh hle a, mipate'n ṭan kan lak a ṭul hle. Mipate'n hnam dang zinga kan hmei­chhiate kan enkawl thiam tâwk lo nia lang hi siamṭhat a ṭul hle bawk," a ti a; bial leh khawtlang tana hmalaknaah party rilru dahṭhaa, theihtawpa ṭan lakpuiah MHIP leh khaw­tlang hruai­tu pawl hrang hrangte a sawm a ni.

MHIP Meet-ah hian branch 14 an tel a, branch hrang hrangte chu hnam lâm hmangin an intihsiak a; hmeichhiate ṭan lakna tur kawng hrang hrangah an infuih bawk.