Joint NGO-te'n pawndum nena Amit Shah hmuah tum an ṭhulh
Chief minister Zoramthanga chuan nimin tlai khan CMO conference room-ah Joint NGO Coordination Committee hruaitute kâwmin, naktuka lo kal tur Union Home minister Amit Shah chu lungawi lohna lantira pawndum leh thuziak nena hmuak lo turin a ngen. Joint NGO chuan thutlukna sûtin, Amit Shah hmuah an tum dan chu an ṭhulh.
Chief Minister nena an inkawm zawhah Joint NGO hi nimin tlai khan an ṭhukhawm a, Home Minister lo hmuah an tum dan chu an ṭhulh leh ta zawk a ni. Joint NGO thuchhuah chuan, "Mizoram sorkar hotute ngenna avang leh Union Home Minister-in NGO-te thu thlen ngaichâng tura hun tam zawk a pek theih tak avangin pawndum leh placard nena hmuah chu ṭhulh rih a ni," a ti. NGO-te thutlukna chu zawm vek turin Mizo mipui an ngen a ni.
Inkhawmnaah Chief Minister chuan, NGO-te thil tum chu thil tih âwm taka a ngaih thu sawiin, "Keini pawhin Citizenship Amendment Bill (CAB) hi kan duh lo a, nang nite nen kan duh lo dan a inang. Kan duh loh thu NEDA meeting-ah pawh na takin ka sawi a, Prime Minister hnenah leh Union Home Minister hmasaah pawh ka sawi tawh a ni," a ti a; PM hnenah phei chuan CAB vanga hlâwkna an neih turte a zawh thu a sawi.
Hmarchhak state dang zingah Mizoram sorkar anga CAB haw ngam tak tak an awm loh thu sawiin Zoramthanga chuan, "BJP sorkarna te, BJP nena sorkarna siamte an ni a, Sikkim lah an MLA eng emaw zatin BJP an zawm leh a. CAB do kawnga hlau hauh loa kal ngam awm chhun, kan duh loh thu sawi na ber kan ni," a ti.
Chief Minister chuan, Guwahati-a NEDA meeting-ah Amit Shah chuan amah leh NGO-te be tura lo kal a duh thu a hrilh tih sawiin, "Lo kal a duhte chuan ṭha ka tih thu ka hrilh. NGO-te'n lungawi lohna lantir in tum hi khu lam pawh ka hrilh a, àwm an ti khawp mai. Mahse, Home Minister anga a lo kal vawi khatna tur a ni a, lungawi lohna lantir kher loin, kan duhte hrilh turin min duh a ni," a ti a; NGO hruaitute chu an thil tum sût turin a ngen.
Zoramthanga chuan, Union Home Minister hi CAB chungchang bakah, ramri venhimna lam sawipui a tum thu sawiin, "Ramri chhim lamah BSF-in an véng a, chhak lamah Assam Rifles-in an veng thung. An veng phui ṭha lo a, Mizo tlangvalte'n veng se kan duh a ni. Police-te ventir dawn ila an indaih si lo a, chuvangin, central sorkarin hlawh an pek tur Border Guard Force din ka rawt tawh a, Mizo tlangvalte employment atan a ṭha dawn a ni. Hemi chungchang hi ka sawipui leh ang," a ti.
Chief Minister hi deputy chief minister Tawnluia, IPR minister Lalruatkima, chief secretary Lalnunmawia Chuaungo, Home secretary Lalbiakzama, DGP SBK Singh leh official dangte'n an ṭawiawm.
Amit Shah hun hman dan tur
l Dar 11:45 am-ah Lengpui Airport a thleng ang.
l Helicopter-in dar 12:05 pm-ah Ṭhuampui Helipad a thleng ang.
l Dar 12:25 pm-ah Raj Bhavan a thleng dawn.
l Dar 12:35 pm-ah Mizo H/S Field-ah exhibition a hawng ang.
l Dar 1:30 pm-ah Raj Bhavan a thleng leh dawn.
l Dar 2:00 - 3:30 pm chhung Raj Bhavan-ah Chief Minister leh NGO hruaitute a kâwm ang.
l Haw turin dar 3:30 pm-ah Raj Bhavan a chhuahsan dawn.