Affidavit dik lo thehluta puhna thubuaiah CM hlui Lal Thanhawla'n thiam a chang

Kum 2013-a Mizoram Legislative Assembly inthlanpuiah affidavit dik lo thehluta puhna thubuaiah chief minister hlui Lal Than­hawla, Mizoram Pra­desh Congress Committee (MPCC) president ni bawk chuan thiam a chang.

Election affidavit dik lo thehlut nia sawi chung-changah hian Lalhriatrenga Chhangte, Kulikawn chuan kum 2018 khan Serchhip District Court-ah Lal Thanhawla lakah thubuai a thehlut a; Representation of Peo­ple's Act, 1951 Section 125-A tlawhchhanin criminal complaint No. 1/2018 ziah luh a ni.

Complaint thehluttu Lalhriatrenga Chhangte aiawhin ukil C Lalramzauva leh a thawhpuite an ding a; Lal Thanhawla aiawhin a ukil Lalremsang­a Nghaka leh a thawhpuite an ding thung. Serchhip District Court-in ṭum eng emaw zat a ngaihtuah hnuah, September 27, 2019 khan thutlukna a siam a; mahse, puan nghal a ni lo.

District court-a judge (Judicial Magistrate First Class) JH Lalparmawii chuan nimin khan Court thutluk­na (judgemnent order) a tichhuak a, Lal Thanhawla chuan thiam a chang ta a ni.

•    Thubuai thehluttu - Lalhriatrenga Chhangte s/o C Kaphnua (L)

•    January 17, 2018 - Lal Thanhawla lakah Serchhip District Court-ah thubuai thehluh a ni.

•    RP Act, 1951 Section 125-A hnuaiah criminal complaint no. 1/2018 ziah luh a ni.

•    Hawla ukil - Lalremsanga Nghaka & Others

•    Hriata ukil - C Lalramzauva & Others

•    Hriata Chhangte-in false affidavit chungchangah tho November 3, 2017-ah Election Commission-ah complaint a lo thehlut tawh.

•    ECI thuràwn angin Hriata Chhangte-in Lal Thanhawla affidavit thehluhna Assembly constituency chhunga District Court (Serchhip)-ah thubuai a thehlut.

•    May 25, 2018 - Court-in thubuai a ngaihtuah. Hawla, a election affidavit-ah kum dik lo ziaka puhna hnâwl a ni a, affidavit dik lo (Kolkata-a ram neih tarlan tel loh) erawh ngaihtuah zui tura pawm a ni.

•    September 27, 2019 - Court-in hearing a zo a, thutlukna a siam.

•    October 3, 2019 - Court-in judgement order a tichhuak a, Lal Thanhawla'n thiam a chang.

•    Thubuai hi ṭum 12 ngaihtuah (hearing neih) a ni.