KHAWTHLIR

Bethlehem Vengthlang Kohhran chuan an kohhran kum 25-na, silver jubilee pualin nimin khan an Kohhran Hall-ah blood donation camp an huaihawt a, mipa 28 leh hmeichhia pahnihte'n Synod Hospital tan thisen unit 30 an pe.

Minister R Lalzirliana chuan nimin khan Thingsulthliah Higher Secondary School-ah National Institute of Electronics & Information Technology (NIELIT) Study Centre thar a hawng. Minister chuan, zirna-in ropui te, hmanraw chang-tlungte aiin zirlaite leh zirtirtute tumruhna leh thawhrimna a pawimawh hmasa tih sawiin, "Ziak leh chhiar thiam kawnga hma kan sawn rual hian, digital literacy-ah pawh hmasawn kan tum tur a ni," a ti. R Lalzirliana hian nimin vek khan Selinga 'Upate Rûn' a hawng bawk.

PRISM party chuan nimin khan thuchhuah siamin, Sinlung Hills Council inthlan turah an party-in candidate an siam dawn loh thu an tarlang. PRISM chuan, "Inthlan turah hian HPC party-in candidate hran siam lo tur leh an candidate-te thláwp turin min ngen a, office bearer-te leh PAC member-te inráwn khawm chuan an mi ngenna anga candidate siam lo turin kan ti ta a ni," an ti.

Mizoram Secondary School Teachers’ Association (MISSTA) chuan nimin khan Synod conference centre-ah annual general conference an hmang a, Education minister Lalchhandama Ralte-in a hman pui. Chawhnu lamah national leh state Award dawngte lawmpuina an hlan.

Mizoram Presbyterian Kohhrana pastor langsarte zinga mi Rev. R Lianbuanga (79) h/o Lalmalsawmi, Mission Vengthlang chu nimin chhun dar 12:30 khan a thi a, vawiinah vui a ni ang. January 31, 1940-a Sialsuka piang Rev. R Lianbunga hi kum 1970-ah pastor atan a nemngheh a ni a, kum 2001-ah a pension. Pastor a nih chhungin bial hrang hrangah pastor hna a thawh bakah, Mizoram Synod-ah statistician, secretary, moderator, executive secretary-te a ni tawh a; Central KṬP leader leh PYF leader-te a ni tawh bawk.