Bru hruai kîr hna ṭan a ni Niminah chhungkaw 47 hruai an ni

Tripura refugee camp-a Bru awm mek, Mizoram khua leh tui dik takte Mizorama hruai lêt hna chu nimin khan ṭan a ni a; nimin bikah chuan chhungkaw 47-te Mizoramah hruai an ni.

Home department hotute aṭanga Vanglaini thu dawn dan­in, Bru lak lêt hna hi Lunglei, Kolasib leh Mamit district-a sorkar official-te'n an thawk a; nimin khan Lunglei district-a awm tur chhungkaw 41 (mi 164) leh Mamit district-a awm tur chhungkaw paruk (mi 27) hruai kîr an ni. Kolasib district-a awm turte erawh hruai kir an la awm lo.

Bru-te lak lêt hna thawhnaah hian buaina a awm lo a, mahse, refugee camp-a Bru pawlte chuan hruai kîr an duh lo tih lantirna banner-te an tár a ni. An banner tàrah chuan, lak lêt an nih dawn chuan khaw din thara dah an duh thu te, an awmna tur an duhna hmun thlantir an duh thu te, Bru-te tana autonomous district council pek an phût thute leh thil dang eng emaw zat an tarlang.

Bru hruai kîr hna hi Lunglei leh Mamit district chuan vawi­inah an thawk chhunzawm dawn a, Kolasib district chuan October 7, 2019 aṭangin an chhunzawm leh chauh ang. Lak let hna hi November 30, 2019 thleng thawh tura ruahman a ni.

Home department hotute chuan, ṭum dang aiin tun ṭumah hian Bru hruai kîr tur an tam zawk an beisei a, Mizoram sor­kar official-te'n tun hnai lawka Bru camp-a Mizoram khua leh tui dik tak enfiah hna an thawh ṭumin chhungkaw 4,323 chuan Mizorama kîr an duh thu an sawi.