ZPM ṭhalai leh MPCY-in Joint NGO thláwp

Zoram Peoples' Movement (ZPM) party ṭhalaite chuan thuchhuah siamin, Citizenship Amendment Bill (CAB) chu a tàwp thlenga dodal an tum thu leh Union Home minister Amit Shah-a lo zin tur, Joint NGO-te'n pawndum nena lo hmuah an tum chu an thlàwp thu an tarlang. MPC ṭhalaite pawhin Joint NGO hmalakna an thlàwp thu an puang bawk.

ZPM ṭhalai chuan, "October 5, 2019 hian Amit Shah chuan CAB leh NRC chungchanga sorkar laipui thutlukna rawn hriattir tura Mizoram a rawn tlawh tur hi kan ram tana him lo a nih avangin ZPM ṭhalai chuan a dodal tlat dawn a ni," an ti a; BJP chuan hmarchhaka an sangawi zawnpui party-te avangin CAB chu Mizote leh hmarchhak mite barhluih an tum hlea a lan thu leh, CAB chu pass a nih chuan Chakma foreigner-te lakah Mizoram a him dawn loh thu an tarlang.

ZPM ṭhalaite hian Amit Shah-a lo zin tur, NGO Coordination Committee-in pawndum nena lo hmuah an tum chu an thlâwp a, mipui a tam thei ang tel turin an ngen a ni. MPC party ṭhalaite pawhin thu­chhuah siamin, "BJP kaihhruai Central sorkarin CAB tihhlawhtlin ngei tuma hmachhawp a neih duh lohna lantir nana Joint NGO-te'n October 5, 2019-a programme an siam hi MPC ṭhalai chuan ṭha kan ti a, kan thláwp tlat a ni," an ti a; Joint NGO hmalakna hlen chhuah a nih theih nan theihtawp an chhuah dawn thu an puang.

MPCY chuan, BJP Mizoram president Prof. JV Hluna’n Joint NGO-te hmalakna sût tura a ngen chu âwm lo an tih thu sawiin, "A hmalakna hi Mizo hnam leh Kristianna phatsanna hialah kan ngai. Mizo hnam anga kan ṭan rualna ­turah hian Dr JV Hluna hi thil dang kal­san a, Joint NGO programme rawn zawm ve zawk turin kan sáwm a ni," an ti.