Aizawla bank-te'n loan pek rûnpui an nei

State Bank of India (SBI) chuan nimin khan Kulikawn YMA Hall-ah Grahak Mela Phase-I (Loan Mela) an buatsaih ṭan a, Rural Development minister Lalruatkima'n a hawng.

Loan Mela hawnna inkhawm hi SBI manager Lalhlimpuia'n a kaihruai a; Lalruatkima chuan, hmasawnna atan loan a ṭangkai thu sawiin, "Ruahmanna fel tak nei chunga loan pûk hi eizawnna kawnga dinchhuahna a ni," a ti. Loan latu zingah din chhuahpui tam tak an awm thu sawiin Minister chuan, "Loan pûka mawhphurhna hria an tam laiin, loan rûl ṭha lo an awm ṭhin hi inenfiah ngai lai a ni. Loan rûl ṭha lote avangin bank-te'n loan pek chhuah kawngah harsatna an nei ṭhin a, hei hian mi tam tak loan hmanga bul ṭan tumte a dang ṭhin a ni," a ti.

RD Minister chuan, bank-te leh mipui tana awlsam zawk tur ngaihtuaha a huhoa loan pêk chhuah rûnpui buahsaih a ni chu ṭangkai taka chhawr ngei turin mipuite duhsakna a hlan a, "Hmasawnna leh bank chu thil inlaichîn tlat a ni," a ti a; Mizo mipuite'n bank hmanthiam kawngah ṭan an lak a ngaih thu a sawi.

Minister Lalruakima hian bank hrang hrangin loan sanction letter an peih sate a dawng turte hnenah a sem nghal a; chu'ngte chu SBI aṭangin mi 160, Mizoram Rural Bank aṭangin mi 10, Bank of Baroda aṭangin mi pathum, Canara Bank aṭangin mi pathum, Bandhan, UCO, Federal Bank leh Central Bank aṭangin pakhat ṭheuh an ni.

Loan pek chhuah rûnpuiah hian Aizawl khawpuia awm bank chi hrang 29-te'n mipui tana dàwr theih turin stall an siam a, vawiinah chhunzawma zawh a ni ang. Loan chi hrang hrang - home loan, car/auto loan, agriculture loan, education loan, MSME loan leh personal loan-te an pe chhuak thei a ni. Loan Mela hi Lungleia UDPA Hall-ah vawiin leh naktukah buatsaih a ni dawn bawk.